Myanmar-in Suu Kyi ngaidam then

Myanmar-a military kaihhruai sorkar chuan Aung San Suu Kyi chu sakhuana kaihhnawiha holiday ni pualin amah hremna an ngaidam then tiin state media chuan a tarlang.
President hlui Win Myint pawh amah hremna tihhniamsaka awmin an rual hian lung in tang 7,000 chuang te lakah pawh hremna tihnep a ni bawk.
Tihian kum 78-a upa Suu Kyi hian kum 33 lung in tang tura tih atangin kum 27 ah tihhniam a ni ta a ni.
State media MRTV in a tarlan danin Myanmar-a military council head Senior Gen. Min Aung Hlaing chuan ngaihdamna hi Suu Kyi case panga laiah siamin heng ngaihdamna pek a nihna thenkhatte hi walkie-talkie dan kalha a kawl tihte leh sorkar laka hel tum tihte pawh a tel.
A tirah chuan Suu Kyi hian thubuai 19 a awrhah thiam loh chantir vek niin hengte hi rights group te chuan Suu Kyi in politics a luhchilh leh tawh ngai loh nana hup beh hlen tumna tiin an sawi.
Hetih lai hian sipaite chuan Suu Kyi kaihhruai mipui thlan sorkar an paihthlak hmun 2 leh a chanve hnuah pawh emergency thlaruk atan pawtsei lehin hei vang hian an intiam anga inthlana buatsaih chu an kalpui dawn lo zui zel a.
Min Aung Hlaing chuan lung in tan 7,749 ngaidam bawkin Buddha an a sermon hmasa ber a thlak ni holiday a hman zui niah thi tura an chungthu rel te pawh ngaihdam zingah an tel tiin MRTV chuan a sawi bawk a.
Army leader chuan foreign prisioner 125 te pawh chhuah zalenin hei bakah hian enthnic armed group member 22 te pawh a chhuah zalen bawk a. Ethnic armed group nena inkaihhnawih tia thubuai 72 pawh a titawp tiin puan a ni bawk.
Mahse ngaihdam zingah hian politics thila lung in tantir sang tam tak te army rorelna duh lohna lantir avanga tang te chu an tel leh tel loh a chiang lo thung.
Assistance Association for Political prisoners, rights monitoring organization te chuan army tena thuneihna an chan hnuah Myanmar ah mi 24,123 manin an awm tawh tiin an sawi a. Security forces te chuan civilian 3,857 chuang an tihlum tawh tiin an sawi bawk.
MRTV thung chuan emergency thlaruk atana pawhsei chu lohtheihloh tiin a puang thung a, ramin inrelbawlna a siamthatna a neih theih nan hun mamawh a la ni tiin chumi hnuah inthlanna neih chauh a ni ang a ti bawk.
Hetih lai hian Thawhtanni khan United Nations chuan Maynmar chu democracy kawng zawh turin a phut zui a ni.
Tun hnai karthum kalta khan Thai Foreign Minister Don Pramudwini chuan lung inah Suu Kyi a hmu a, man a nih hnua foreign visitor a neih hmasak ber a ni a. Don chuan Suu Kyi chu a hriselna dinhmun a that thu hrilhin harsatna chinfel a nih theih nana inbiakna neih a duh thu a sawi tiin a sawi.
July 9-a an meeting neihah Suu Kyi version erawh hmuh tur a awm lo va, Thailand minister nen hian darkar khat leh a chanve vel an inhmu a ni. Myanmar sipaite pawhin he inhmuhna hi a thlen ngei thu sawiin mahse mi pahnih thil sawi dun a nih avangin engmah hriat an nei lo an ti ve thung