Myanmar ram buaina nasa zel

Myanmar military sorkar laka helna thlaruk lai kalpui a nih tawh hnuah opposition forces te chuan hmasawnna nasa tak an hmu tawh a, mahse, civilian te tawrhna chu a nasa zual hle tawh thung a, Southeast Asian rama civil war chhuak chuan zual lama pan zel rih bawk.
Myanmar ethnic group chak tak te leh resistance forces thar piang ve zel te chuan hmun tin atangin nawrna an kalpui zel a. Myanmar sipaite chuan boruak, lawng leh laipui te hmangin Opposition te awmna nia hriat facility hrang hrang te chu beiin damdawi in pawh an zuah chuang lo.
“Mipui nawlpui tena an duhlohna an lantir chuan hlauthawngin a siam a ni” tiin Dave Eubank, US Special Forces sipai Free Burma Rangers, humanitarian aid organisation sipai leh civilian te pawh thliar lova kum 1990 atanga tanpuina pe tawh thin chuan a sawi.
“Myanmar sipai te chuan damdawi in, Biak In, school leh monastery te chu mihring inenkawlna lama hmun pawimawh a ni a. Chung te chu pawisak nei miah lovin an suasam a ni” tiin Eubannk chuan a sawi a, “Chu chu thil thar a ni” a ti bawk.
Myanmar sipaite chuan Myanmar ram zah ve aia tlem zawk an thunun thei chauh tawh a, central Myanmar captial Naypyidaw telin an insawrbing tawp mai a, Naypidaw pawh drone hmanga beih tawk tawh niin khawpui lian ber Yangon erawh China leh Russia puihna hnuaiah chak taka thuamin a la awm thung.
“Sorkar paihthlak a nih hnuah sipai sorkar chu kar hnih vel hnuah chuan a tluchhe mai ang an ti a ni” tiin February 2021 daih tawh khan Morgan Michaels, International Institute of Strategic Studies analyst Myanmar Conflict Map project kalpuitu chuan a lo sawi tawh a.
“Tunah erawh sipai sorkar chu a chak lo takzet tawh a, tun ang aia chak loh hi a nei ngai lo. Dinhmun derthawng takah an awm mek a ni,” tiin a sawi.
Myanmar sipai thupuangtu Thet Swe chuan sipai ten building leh hmun pawimawh civilian te tawmna an thlurbing nia an puhna chu hnawlin chung hmun te chu opposition te tihchhiat zawk a ni tiin a sawi a, mahse, finfiahna engmah pek a nei lo.
“Sipai ten hospital, biak in leh civilian te he rama awm te an khawih ngai lo” tiin the Associated Press te hnenah a sawi a.
Inbeihna chuan mipui chen tamna lam a hawi hnuah nikum October thla atang khan mi maktaduai 1 chuangin an chenna in leh lo an chhuahsan tawh a, chuvang chuan Myanmar mipui maktaduai 56 vel atangin chenna mumal nei lova awm mek maktaduai thum vel an awm a ni tiin UN humanitarian aid agency chuan a sawi.
Myanmar health care system chu mumalin a awm tawh lo va, food supply pawh a buai zel a, nikuma ei leh bar leh puihna mamawh maktaduai khat atangin tunah chuan 18.6 million vel tanpuina mamawh an tling tawh a, chung zinga maktaduai 6 chu naupang an ni tiin UN agency te chuan an sawi.
Myanmar buaina hi February 2021-a Aung San Suu Kyi elected sorkar sipai tena an paihthlak atanga intan niin nikum October thla khan militia lian intel khawm Three Brotherhood Alliance te chuan sipaite beia an inthurual hnuah buaina a nasa zual ta a ni.
Arakan Army, Myanmar National Democratic Alliance Army leh Ta’ang National Liberation Army te inthual chu Myanmar a ethnic minority militia powerful ber ber an ni.
Myanmar hmar leh hmarchhak lamah ram zau tak la tawhin China nena insumdawntawnna ramri pawimawh tak te pawh an thuhnuaiah dah tawhin military base hmun pawimawh tak tak an la tawh bawk.
Chutih laiin people’s Defense Forces te armed resistance group ni tho National Unity Government thlawp a, Myanmar legitimate administration inti te chuan sipai te chu an bei ve reng bawk.
Myanmar sipai hlauthawng chuan tun hnaiah sipaia intanluih tir a kalpui bawk a, thalaite sipaia tangrual te chu ram chhung chhuahsan a khap bawk.
China chuan Myanmar hmar lamah January thla khan Three Brotherhood Alliance te nena inkahhaina awm theih nan ruahmanna a siam chu an pawm a. Mahse, Arakan Army te chuan khawthlang lamah Rakhine state-ah nasa takin hmasawnna an nei mek a, PDF leh ethnic armed group dangte chuan hmun dang dangah sipaite chu an bei mek reng bawk.
Chhimchhak lamah Karen fighting forces, Karen National Liberation Army te chuan Myawaddy military base chu April thla khan an thununna hnuaiah an dah vek tawh bawk a, Thailand nena inrinna hmun te chu KNLA te chuan an thunun tawh a ni.