Mizoram Youth Commission chairman Dr Vanlaltanpuia, MLA chuan super IAS pualin cheng nuai 200 vel an hmanral tawh thu sawiin, tuna UPSC mains exam tur Mizo 13 chu tha taka exam an hmachhawn theihna’n an enkawl vek tur thu a sawi a. Super IAS 2023 an buatsaih leh turah Mizo thalai a tam thei ang ber exam turin a sawm.
UPSC mains exam hmachhawn tur mi 13 zinga pathum chu Delhi-a exam tur an nih avangin Delhi-ah an chhuk tawh tih a sawi a. Midang 10 chu Mizorama exam tur niin, MYC Youth Centre-ah internet facility changtlung tak an dah sak bakah kartin exam an buatsaih sak tur thu a sawi a. Mizoram State Library-ah an exam na tur atana lehkhabu pawimawh an dah sak vek thu leh an mamawh hrang hrang an buaipui sak vek tur thu a sawi.
Super IAS 2023 an buatsaih leh tur chu thalai harsa deuhte tan scholarship a that thu sawiin, “Tehfung mumal tak hmang chungin thalai lehkhathiam, innghahna tlak leh rintlak tak tak lak tum a ni a. Kum dang angin lak tur bituk a awm dawn loa, kan duhthusama tha apiang lak tum a ni,” Dr Vanlaltanpuia hian a ti.
Mizo zingah kum rei tak chhung IAS kan neih tawh loh avang leh kan lo beh rei deuh tawh avangin tun dinhmunah IAS neih nghal thuau a har tih MYC chairman hian a sawi a. Hemi atana cheng nuai 200 vel an sen tawh chu na a tih loh thu sawiin, “Hei hian nasa taka thalaite thinglungah IAS ni thei tura chona a nei thar hi lawmawm a. ‘Super IAS’ chu fiamthuna’n miten hmang thin mah se, tun atanga kum 5 velah chuan rah tha tak a chhuah kan beisei a ni,” a ti.
MYC-in IAS coaching-ah atan nuai 200 seng tawh
Get real time updates directly on you device, subscribe now.