Ralmuanna hi Mizoram thawn chhuah theih zinga hlu ber a ni – Chief minister

Mizoram ralmuanna chu state dang leh ramdangte awh ber a ni a, he state-in thawnchhuah tur a neihte zinga hlu ber pakhat a ni tih chief minister Zoramthanga chuan a sawi.
Mizo National Front leh India sawrkarin peace accord an ziah vawi 37-na pualin Nilain khan MINECO-a Open Gym bulah thingtiak phun (ceremonial tree planting) hun an hmang a. He hun hmanpuitu chief minister chuan kum 1986-a MNF leh sawrkar laipuiin remna thuthlung an ziah chuan Mizoramah remna leh muanna tluantling a thlen tih sawiin, kum 20 chuang buaina a reh thei ta tih a sawi.
Rambuai lai chuan Mizoram chu manganna raltitna authawmin a luahkhat thin tih sawiin, “India hmarchhak mai ni lo, Asia khawmualpuia chhim-chhak (South-east Asia) a ram ralmuanglo ber a ni hial a. Tunah chuan hnam sipai huaisente zarah India rama state ralmuang ber leh midangte entawn ber a ni ta a ni,” a ti.
Mizoram ralmuanna chu state dang leh ramdangte awh ber a ni tiin, Mizoramin thawnchhuah tur a neih zinga hlu ber pakhat a ni tih Zoramthanga hian a sawi a. Ramdang leh state thenawm atanga sahimna zawnga lo lutte chungchang sawiin, rilru leh taksa damna zawnga rawn kalte chu hmangaihna nena lo tuamhlawm turin Zoram mipui a chah.
An thing phun, Thlado tiak chu Forest department-in a thlan a ni tih sawiin, thlan tur tak an thlang niin a sawi. “Thlado thing hi fei leh tlo tak a nih avangin, kan piputen in sak na’na an hman ber thin a ni a, Remna Ni puala phun a ni hi a inrem hle,” Zoramthanga hian a ti. Khawvel boruak inthlak danglam nasat avanga khuarel chhiatna thleng fo laka himna atan environment humhalh a pawimawh hle, tiin, Mizoram pawhin theihtawpin hma a la chho mek tih a sawi a ni.