MZI leh MCCA-in zaipawl enkawl thinte pualin seminar buatsaih dawn

Mizo Zaimi Inzawmkhawm (MZI) leh Mizoram Choral Conductors Assn. (MCCA) chuan vawiin, October 21, 2023 hian Aijal Club-ah zaipawl hrang hrang enkawl thin te pualin seminar an buatsaih dawn a. Dr. Henry Lalmawizuala leh Dr. Steven L Ralte te resource person an ni ang.
‘Cultivating excellence building and leading a dynamic choral team’ tih thupui hmanga seminar hi chawhma dar 10-ah tanin, nilenga neih tura ruhman a ni a. Chawhma lamah MCCA Vice President Lalpiangliana’n a kaihhruai ang a, chawhnu lamah MZI-a zaipawl sub-committee Chairman Chhawra Khiangte-in a kaihruai thung ang. Thupui then hrang hrang zirhovin sawihona leh zawhna leh chhanna hun te an hmang ho dawn a ni.
Resource person tur Dr. Henry Lalmawizuala hi rimawi lama thiamna sang nei, zai leh rimawi lam hawi thu tam tak ziak tawh leh paper pawh present fo tawh a ni a. Zaipawl lama tawnhriat leh sulhnu nei tha tak niin, Bible Society zaipawl BESY Choir-ah 2001-2004 chhungin member a ni a, 2005-2010 thlengin conductor a ni. Salvation Army Boundless Congres 2015-a London-a neihah khan zai leh zaipawl kaihhruaiin a tel a. Kum 2010-2013 chhung khan Aizawl Temple Corps Songster Conductor a ni tawh bawk.
Resource person tur pakhat zawk Dr. Steven L Ralte pawh rimawi lama thiamna sang tak nei, lehkhabu leh seminar paper engemawzat ziak tawh a ni a. Kum 2018-a Asia Pacific Choir Games & Grand Prix of Nations-a Mizo Cardinal Choir te Gold Medal lakpuitu, Worlad Choir Games-a Silver medal lakpuitu a ni. Handels Messiah : Christmas Edition leh Handels Messiah tonic solfa te buatsaihtu leh Mizo tawnga lettu niin, Zarkawt Presbyterian kohhran zaipawl Conductor a ni.