MZP-in chief minister kawm Eiru lo bera min thlangtu an ni – CM

MZP-in chief minister kawm
Eiru lo bera min thlangtu an ni – CM
Mizo Zirlai Pawl Gen. Hqrs. hruaitu tharte chuan Nilaini khan chief minister Lalduhoma an kawm a. An hmachhawp an sawipui
Chief minister chuan MZP hruaitu tharte chu zirlaite, ram leh hnam tana ke an penna kawngah duhsakna a hlan a, ram leh hnam tana tha turah chuan theihtawp chhuaha thawhho puiah a sawm tih a sawi.
MZP president Dr C Lalremruata pawhin zirna chungchang leh zirlaite chu an ngaihpawimawh ber dawn tih sawiin, ram leh hnam tana tha turah chuan sawrkar thawhpui an inpeih reng tih chief minister hi a hrilh.
Hemi hnua chief minister-in a social media account lama a tarlanah, MZP Gen. Hqrs hruaitu tharte nen inpawh taka inkawmin thil hrang hrang an sawiho tih a sawi a. MZP nen hian inzawmna thuk tak an nei, tiin, lawmthu a sawi fo thin tih a sawi.
“Politician eiru lo berah min lo thlang tawh a. Remna leh muanna a awm theihnana ka phak tawka ka lo tih ve chhun min hriatsakin chawimawina min hlan tawh bawk,” a ti.