MZP-in mi pahnih tan UPSC coaching tihsak

MZP-in mi pahnih tan
UPSC coaching tihsak
Union Public Service Commission hnuaia exam hmachhawn tura inbuatsaihna atan New Delhi-a coaching kal turin Mizo Zirlai Pawl chuan senso a tumsak dawn.
North East Students’ Organisation (NESO) chuan hmarchhak state atangin UPSC Combined Competitive Exam-a tling an tlem tual tual avangin kumin hian NE state tin atangin mi pahnih thlangchhuak turin a hnuaia inziaklut zirlai pawlte a ngen a. Hemi ang hian MZP leh NESO tangdun chuan Mizoram atanga sponsor tur hi written examination leh personal interview hmangin a thlang a, heng mi pahnih hi coaching an kalna tur NESO leh MZP hian a tumsak dawn bakah an awmna tur a ngaihtuahsak a ni dawn a, thlatin stipend an dawng bawk ang.
MZP-in Next IAS Institute New Delhi-a Mizoram atanga kal tur mi pahnih a thlan chu – Remruatfela s/o Zolawma leh Obadia Zorinpuia s/o Lalchhuanmawia an ni a. An rawt pahnih zinga remchang lo an awm a nih chuan reserved panel-ah mi pahnih dah an ni. Thlan chhuahte hian September 1-ah class an zawm dawn a ni.
MZP chuan Mizo thalaite UPSC exam-ah a tam thei ang ber tling turin a duh a, hemi kawngah hian inelna thianghlim tak nei turin Mizo zirlaite a ngen tih a sawi a ni.