MZU-ah tech workshop

The Innovation and Technology Foundation, IIT Bhilai (IBITF) leh Mizoram University tangdun chuan nithum awh ‘Fintech Ignite – Workshop to Empower Innovation and Entrepreneurship in Fintech for Northeastern India’ tih thupui hmangin September 4-6 chhung workshop neih a ni.
School of Engineering & Technology MZU dean Prof. Sudipta Chattopadhyay chuan kan ban phakah technology dahin, mahni kutkawih ngeia technology lama thil siamchhuah chuan India ram pawh technology lamah tihmasawnin, kan siam chhuah chu ram dangah zau zawkin kan hralhchhuak thei dawn tih a sawi.
MZU vice chancellor leh IIT Bhilai aiawhten thu an sawi bawk a. Chawhnu lamah online hmanga presentation ngaihthlak a ni.
He workshop-in a tum ber chu ‘financial technology (fintech)’ kan tih online hmanga sum kan chet kualtir velna lam kaihhnawiha technology thar siam chhuah/ hmuh chhuah leh he fintech hmanga hlawk zawka sumdawnna kalpui dan tur a ni. Workshop hian hmarchhaka zirtirtu leh zirlaite a thlur deuh bik a ni.