Na zawkin ruihhlo do tan dawn

Na zawkin ruihhlo do tan dawn
Home minister K Sapdanga’n a lo sawi lawk tawh angin, kumin September atang hian Mizorama ruihhlo luhna ber Myanmar ramri lamah na zawkin ruihhlo do beihpui thlak tan a ni dawn a. Hetihrual hian ruihhlo rawn leh luhna state thenawm nena inrina lamah pawh hma lak a ni dawn.
Thawhtanni chawhnu hian Home minister ho hian na zawka ruihhlo do beihpui thlak tum hi khuhhawn a ni dawn a. Inrinni-a Bairabi leh Vairengte chhehvel ramria police duty-te leh khawtlang hruaitute tlawha fehchuak Home minister hian, Aizawl mai ni lo, thingtlang khua thlengin ruihhloin min luhkhung nasa tawh a, rimru fim pu zawkte aia ruihhlo ngaite an inluling ta zawk nia lang chu a tha lo hle, tiin, ruihhlo ngaite kan nek chep ve a ngai tawh nia an hriat thu a sawi.
Ruihhlo hi khawchhak atanga lokalin Assam leh Tripura atangin Mizoramah an rawn leh luh pui thin nia a lan thu a sawi a. Ramri inkalpawh theihna zau avangin, ramri bulhnaia khua zawng zawng ruihhlo do kawngah insangmar turin a sawm tih a sawi a ni.
“Kan ram dinhmun en hian nasa lehzuala ruihhlo do beihpui thlak a ngai niin kan hria a, September atang hian beihpui kan thlak dawn a ni,” K Sapdanga hian a ti.
Hetihlai hian kar kalta lama Home department leh Central YMA hmalaknaa Mizorama ruihhlo lut zel tur ven kawnga beihpui thlakna – ‘special operation’ neia an fehchhuahnaah Mizoram Pilice IGP H Ramthlengliana chuan Champhaia NGO hrang hrang hruaitute leh VC-te nen an inkawmnaah, Myanmar atanga ruihhlo lo lut zingah zaa 10 vel chauh man a ni a, nasa zawkin ruihhlo do a tul tih a sawi. Champhai district chu ruihhlo tawlhna luhka lian ber a ni, tiin, kum 2024 chhunga narcotics case an ziahluh 370 zinga 170 chu Champhai Police ziahluh a ni a; kumin August 10 thleng khan ruihhlo kaihhnawih thubuai 150 chuang ziahluh zing zaa 50 aia tam chu Champhai district-a ziah luh a ni a, ruihhlo do kawngah Champhai district mipui tanrual a tul takzet tih a lo sawi tawh a ni.
Ruihhlo lo lut tur ven kawngah khawtlang hruaitute thawhpuia an tha tichak turin police 32 tirhchhuah an ni dawn tih IGP hian a sawi a. Tunhnaiah Myanmar lammiten ruihhlo kaihhnawihah ramri kana Vanzau VC-te an rawn vau chu Mizoram sawrkarin a ngaihaw hle a, hetiang thil hi thleng tawh lo se an duh tih a sawi a ni.
Myanmar atanga ruihhlo rawn lut venna beihpui thlakna hi September atanga December 31 thleng kalpui phawt tumin ruahmanna siam a ni.