Nachhawkna thenkhat ibuprofen ang chi te hian nu naupai ten nau an chhiat theihna risk a let hnihin a tisang thei a, chumi hre lo nu naupai sang tam takin nachhawkna hi an ei thin niin an sawi.
University of Montreal-a mithiam ten hmeichhe kum 15 leh 45 inkar,mi 47,050-a zirchianna an neih hnuah nuin nau a pai atanga kar 20 vel thleng hian nachhawkna ei a hlauhawm thei niin an sawi a, ibuprofen ang chi te an ei phei chuan nau an chhiat theihna risk a let 2.4 in nachhawkna ei ve lo te aiin a tisang thei niin an sawi.
Damdawi packet-ah te hian warning ‘naupai laia ei loh tur’ tih te chu ziak ve bawk mahse, nu naupai paruk zela pakhat velin heng nachhawkna te hi ei tho anga chhut a ni.
He zirchiannaah hian nachhawkna group khat Non-Steroidal Anti Inflamatory Drugs (NSAIDs) an tih te chu zirbing deuh a ni a, NSAIDs zingah hian ibuprofen leh naproxen te pawh a lar pawl tak an ni.
Hetihlaihian paracetamol erawhin nauchhiatna a thlen ve lem lo niin an sawi thung.
Mithiam te chuan ibuprofen ang chi nachhawkna hi mum khat lek ei pawhin nau kan chhiat phah thei niin an sawi a, nu chhul-a nau insiam tur a tibuai thei a, chu chuan nauchhiat kan tih ang hi a siam ta a ni. Chutiang chu spontaneous abortion te pawh an ti a ni awm e.
Hetih rual hian hmeichhe mei zu nasa, zu nasa leh thau lutuk te tan ibuprofen ei rau rauah pawh risk hi a sang lehzual niin an sawi.
He zirchianna chungchang hi Canadian Medical Association Journal-ah tarlan a ni.
Nachhawknain nauchhiatna thlen thei!
Get real time updates directly on you device, subscribe now.
Next Post