Nawrlirha naupang panga nawra km 1 tlan thleng rang thei record siam

Idaho a cheng (Idaho tih tawh chuan rilru-ah David Rush a rawn lang nghal mai thei, ani hi Guinness World Record 250 chuang siam tawh kha a nia, mahse, tun tum chu midang an ni ve thung), Chad Kempel chuan a fa panga te chu nau nawrhna (stroller) a nawrin, minute 5 leh second 34 chhungin kilometer 1 a nawr thleng hman a, Guinness World Record a siam.
Chad Kemple hian Eagle High School track-ah record hi a siam a, Chad hian a fate Savannah, kum 8; Avery, kum 7; leh a fa phir panga zinga pathum Noelle, Grayson leh Preston, kum 5 te stroller-ah hian nawrin, a chak thei ang bera tlan puiin, minute 5 leh second 34 chhungin km 1 a nawr thleng hman a ni. Record siam tuma an beih lai hian a fa phir panga zinga pahnih leh a nuin field sir atangin an lo fuih phur ve thung a ni.
Chad chuan, “Fa phir panga kan neih avangin naute panga nawr theihna tur stroller kan mamawh a, chuvangin hetiang nawrlirh hi kan lei ta a, a ke a vir tha duh bawk a, exercise lak nan tiin naupang panga nawr chunga tlan hi ka ngaihtuah chhuak ta a ni,” a ti a, tunah chuan record a siam pui ta a ni.