Naga ten UCC duh lo bur

Constitution chuan India mipui te ‘diversity’ leh ‘plurality’ chu pawmin hei vang hian Uniform Civil Code (UCC) chu tuna a awm dan ang hi chuan ‘idea of India’ kalh a ni, tiin Central Nagaland Tribes Council (CNTC) te chuan 22nd Law Commission, tun hnaia UCC chungchanga public opinion diltute hnena lehkha an thawnah an ziak lang.
CNTC ah hian Nagaland-a tribe lian pathum – Ao. Lotha leh Sumi te an tel vek a, Member-Secretary, Law Commission hnenah lehkha an thawnah UCC kalpui luih a nih chuan ‘tribal community-ah nghawng turu tak a nei ang’ an ti bawk.
Ao, Lotha leh Sumi tribes te population belhkhawm chu kum 2011 Census ang chuan nuai sarih vel an ni a.
July 1 khan Law Commission in public opinion lak a tum thu a sawi chu chhang letin CNTC te chuan, “Nagaland chu tribal State niin Indo-Naga political issue chinfel a la ni lo chungin Indian Union hnuaiah a danglamna leh nunna angin a thang mek a. Nagaland a tribe hrang hrang te chuan customs culture leh traditions hrang theuh kum za tel an lo kalpui tawh te personal law in a vialchiat an nei vek a ni,” tiin an sawi bawk.
“Tun hnaia ‘uniformity leh conformity’ behchhana chetlakna hian India ram hmun hrang hranga hnam hrang hrang, culture leh tawng inang lo tak tak te leh sakhuana lam pawh tlem zawk te him lo riauin a inhriattir a ni,” an ti bawk a.
CNTC te chuan Nagaland chu Article 371A of the Constitution hnuaiah humhimin a awm a, State legislature-in remtihna a pe a nih ngawt loh chuan ‘sakhua leh khawtlang inrelbawlna kawngah Nagas, Naga customary law leh kalphugnah te, civil justice leh criminal justice kaihhnawihah te, customary leh ram leh resources neitu nihna kawngah te’ Acts of Parliament in a huam loh a ni, an ti bawk a.
CNTC te chuan 21st Law Commission pawh khan kum 2018-a consultation paper ‘Reform of Family Law’ ah pawh UCC chu ‘tul lo leh kalpui atana tha lo’ an lo ti tawh an ti bawk a.
“Heng vangte hian 22nd Law Commission chu idea of India chu ‘unity in diversity’ behchhan kengkawh turin kan ngen a ni. Constitution hmanga Nagaland humhimna hi Nagaland leh Indian Union te thlunzawm tu niin hengte hi eng dan mahin a luahlan theih a ni lo” tiin tribes council te chuan an sawi bawk.