Nagaland leh Tripura-ah BJP Meghalaya-ah pawh ni tho thei

Nagaland politics-a nghing lo leh chief minister ni rei ber Neiphiu Rio chuan a zawn zata a term nga nan chief minister nihna a chelh leh dawn.
Rio party NDPP leh BJP te tang dun chuan Assembly seat 60 awmah seat 33 hmuin chakna an chang a ni.
Tihian Neiphiu Rio hian veteran leader SC Jamir-an chief minister tum thum a lo nih tawhna chu a khum ta var var a. Rio hian Northern Angami-II Assembly constituency-ah a tumpui Congress candidate Seyievilie Sachu chu vote 15,824-in a hneh a. Vote awm zawng zawng 17,045 niin Rio hian vote 92.87% lawih a hmu a ni.
Rio hi a hma chuan Congress party member niin kum 2002 khan Naga People’s Front-ah inletin kum 2003 khan a tum khat nan chief minister niin kum 2014 khan Lok Sabha election chuh vangin a bang a, NPF candidate in Lok Sabha member ni tura thlantlin a ni bawk.
Kum 72-a upa ni tawh Rio hian kum 2016 khan chief minister nihna chelh lehin kum 2018 Assembly inthlan dawnah NDPP zawmin BJP te nen an thawkho zui a ni.
Inthlan result puan takah National Democratic Progressive Party (NDPP) te chuan seat 21 an la a, an thawhpui BJP te chuan seat 12 an la thung a. NDPP-BJP te hian tun inthlanah hian 40:20 seat sharing an kalpui a ni.
Nagaland-in hmeichhe MLA nei
Nagaland-ah NDPP candidate Hekani Jakhalu chu member 60 awmna Nagaland Assembly-a hmeichhia thlan tlin hmasak ber niin Dimapur-II constitutency atangin thlan tlin a ni.
Tihian Nagaland chuan a tum khat nan hmeichhia MLA a nei ta a. Hekani Jakhalu hian sitting MLA Azheto Zhimomi, Lok Janshakti Party (Ram Vilas) chu 1,536 votes in a hneh a.
Kumin Nagaland Assembly inthlana candidate hmeichhia 183 vawrchhuah zinga hmeichhia pali zinga pakhat a ni. “Kan team leh constituency te tana hnehna a ni a. Ka laka rinna an nghah avangin ka lawm a ni,” tiin Jakhalu chuan a sawi a, thlan tlin a nihna hmun hi Dimapur, Nagaland commercial hub-ah a ni.
US-educated lawyer leh social activist niin Jakhalu hian amah ngeiin a din YouthNet, Nagaland-a thalai leh hmeichhiate tihhmasawn nana kum 17 zet a lo thawhna chuan rah tha a chhuah tiin a sawi.
Kum 1963-a State a nih atangin Nagaland-in hmeichhe MLA a la nei ngai lo. MP erawh hmeichhia pahnih a nei tawh thung a, Rano M. Shaiza, United Democratic Party chu parliamentarian a thlan tlin hmasak ber niin kum 1977 khan thlan tlin a ni a. Kum 2022 khan BJP mi leh sa S. Phangnon Konyak chu Rajya Saha member atana thlan tlin a lo ni tawh bawk.
Tripura
BJP-IPTF alliance chuan Tripura Assembly constitutency member 60 awmna inthlanah seat 33 lain chakna an chang a, sorkar an siam leh dawn a ni.
Tripura princely family scion Pradyot Kishore Debbarma party Tipra Motha te chuan seat 13 an la thung a, Left-Congress alliance te chuan seat 14 an la thung a, Debbarma party te hian Left tamna thin tribal vote an hui nasa hle.
Trinamool Congress te chuan seat 28 an chuhah pakhatmah an la thei lo va, an vote share pawh 0.88% chauh a tling pha.
BJP leh Indigenous People’s Front of Tripura (IPTF) te chuan a tum hnih nan chakna chang mah se kum 2018 inthlan aiin seat an la tlem zawk a, hei hi a chhan ber chu Tipra Motha tena tribal vote an hui vang a ni.
Saffron party ten seat 55 an chuhah seat 32 an la a, vote tla zawng zawng atangin 38.97% an hui pha a, IPTF te vote share erawh 1.26% chauh a ni thung.
Kum 25 chuang rorelna an kalpui hnua 2018 atanga namthlak tawh Communist Party of India (Marxist) te chuan kum 2018 khan seat 16 an la a, kumin hian seat 45 chuhin seat 11 an la a, Left party dang – Forward Bloc, CPI leh RSP te chuan seat khatmah an la lo. Congress ten seat 13 chuhin seat thum an la tung.
Meghalaya
Assembly seat 60 awmna Meghalaya inthlan result puanah sorkar-na siam zo khawpa chak an awm dawn lo niin a lang a. He chanchin ziah lai thleng hian party mala sorkar-na chang thei tur an awm lo.
He chanchin ziah lai thleng hian Conrad Sangma party NPP te chuan seat 24 lain seat hnihah hma an hruai a, UDP te chuan seat 11 la thungin, INC ten seat 5 an la bawk a, midang ten seat 17 an la a ni.
Meghalaya Chief Minister leh Nation People’s Party (NPP) supremo Conrad Sangma chuan Union Home Minister Amit Shah chu sorkar-na siam tur chungchangah Thawhlehni daih tawh khan a be lawk nghal niin Assam Chief Minister Himanta Biswa Sarma chuan a sawi.
Sarma chuan BJP president J.P. Dandda pawhin Meghalaya BJP unit te chu sorkar thar siam tur chungchangah NPP te thlawp turin a ti tiin a sawi bawk a.
Meghalaya Deputy Chief Minister Prestone Tynsong chuan tun inthlanah party aiin mimal candidate an pawimawh zawk tiin a sawi a. Pynursla constitutency atanga thlan tlin chuan absolute majority an beisei laiin an beisei anga thil a awm loh thu a sawi a.
“Meghalaya politics-ah chuan party aiin mimal candidate a pawimawh zel a. Nominee te chu inthlana chakna siamtu zawk an ni a, party a ni lo” tiin Tynsong chuan a sawi a. “Hneh taka thlan tlin kan nih kan inbeisei a, kan rin angin thil a awm lo,” tiin a sawi.
NPP te hian sorkar kal chhuak taah khan party dang panga te nen sorkar-na an siam a, kum 2023 inthlanah erawh a malin an ding a ni.