Nakkum World Cup khel tura thutlukna la siam lo Messi

Nakkum World Cup khel tura
thutlukna la siam lo Messi
2026 World Cup khel tura tling tawh world champion Argentina chuan Ningani khan Buenos Aires khawpuia South American World Cup qualifier match-ah si thum faiin mikhual Venezuela an sawp a, kha match-a goal hnih khungtu captain Lionel Messi chuan nakkum World Cup a khelh dawn leh dawn loh chungchangah thutlukna a la siam lo tih a sawi.
Fifa tournament lian ber tum nga ngawt khel tling tawh Messi hi tunah kum 38 mi ni tawhin, Venezuela laka goal hnih a thun hnu khan 2026 World Cup khelh leh khwlh loh chungchang zawhna chhangin, “Kan la hria ang chu. Tun dinhmunah erawh World Cup chungchangah thutlukna ka la siam lo,” a ti.
Eight-time Ballon d’Or winner chuan tun ang kum tawhah ram tana khelh chhunzawm zel emaw World Cup-a la inlan leh tur emaw chuan phurna leh thathona neih a tul thu leh chuti ang nei zel tur chuan theihtawp a chhuah kal mek tih a sawi.
“Ram tana khel tura la tha tawka ka inngaih chuan nuam ti takin ka la khel mai a, fuh tawk tawk loa ka inngaih chuan nawm lohna a awm mai a, inlan loh mai pawh ka thlang mai tur a ni.
“Season-te han hmang zo phawt ila, pre-season ka la nei dawn a, nakkum World Cup hmain thla ruk lai a la awm a, hetih chhung hian eng rilru nge ka put dawn tih leh ram tana la inlan leh ka zuam dawn em tih chu a la rawn inhril mai ang,” tiin tun dinhmuna nakkum tournament a thlir dan a sawi.
Kum 2022 khan captain ni chungin Messi hian Argentina kuta World Cup trophy lut pathumna a hlawhtlinpui a, nakkum World Cup khel tur pawh hian an thlem thlu zo leh ngei tura beisei a ni!
Buenos Aires inkhel kha Argentina leilunga Lionel Messi inkhelh tawpna tur a nih rinna a lian a, a chhan pawh inkhelh bana Messi thusawi hian a tinzawn tlat a ni!
Mipui 80,000 hmaa goal hnih a thun zawhah a fate pathumin an tawiawm Messi chuan, “Kan mite hmaa Argentina rama inkhelh hi a hlimawm fo thin a, tuntum pawh hian ka hlim takzet a, heti ang chiah maia ka chipuite hmaa he hmuna tawpna nghahchhuah hi ka lo dream dan chiah chiah a ni.
“Kum tam tak chhung khan Barcelona fans nen inzawmna duhawm kan lo nei tawh thin a, khati ang bawka he hmuna ka ram leh chipuite nena inzawmna leh inpawhna neih hi ka lo beisei dan chiah a ni,” tiin a sawi a, home match khelh zawh inmangthana a sawi tlat!
Mas Monumental stadium-a goal hmasaber kha first half minute 39-a captain Lionel Messi tihluh niin, Julian Alvarez-a siamsak a ni a, kha bak half time hmain goal dang a luh belh lo.
Second half minute 76-ah Lautaro Martinez chuan Nico Gonzalez-a cross atangin mualneitu team goal hnihna a khung a; minute 10 la awmah Thiago Almada chhawpsak atangin Messi chuan a goal hnihna leh sithum faia Argentina chakna goal a khung a, home fans an sapatal!
Barcelona striker hlui Messi hi South American qualifiers-a goal khung hnem ber niin, Ningania goal hnih a thun leh nen goal 36 a khawl tling.
Argentina tan pawh top scorer ni mekin, game 194-ah international goal 114 a thun tawh.
South American qualifying group-ah Argentina hian match 17 khelin point 38 nen CONMEBOL table-ah hma an hruai mek a; tarlan tawh angin, 2026 World Cup khel turin an tling tawh a; away-ah Ecuador an luhkhung leh ang.
Point 18 nen table-a pasarihna luahtu Venezuela hian playoff beiseina nei zui thei turin an tum leh tur pangana Colombia an hneh ngei ngei a ngai tawh.
Ningani South American qualifiers inkhel dangah Brazil pawhin sithum faiin Maracana khelmuala an mikhual Chile an sawp ve bawk.
Brazil goal thum hi Estevao, Lucas Paqueta leh Bruno Guimaraes-te thawhkhawm niin, khelh 17-a point 28 an neih tawh nen table-ah pahnihna an luah chho.
3-0 bawka Peru hnehtu Uruguay chuan point 27 nen pathumna an thut a; Peru laka goal thuntute hi Rodrigo Aguirre, Giorgian de Arrascaeta leh Federico Vinas-te an ni.
Kum 16 hnua World Cup khel tura tling leh ta Paraguay nen goal awm loa an inhnehtawk avangin point 26 hum chungin palinaah Ecuador an tlahniam.
James Rodriguez, Jhon Cordoba leh Juan Fernando Quintero-te goal khat theuh tihluh hmanga sithum faia Bolivia sawptu Colombia pawhin point 25 nen pangana luah chungin nakkum World Cup khel turin an dinhmun an sawhnghet ve ta bawk.
South American World Cup qualifying khela ram 10 inlan zinga point hmu sang parukte’n automatic-in nakkum World Cup an khel dawn a, table-a pasarihnain intercontinental play-off kaltlangin ‘chance’ an la nei leh dawn a ni.