Nakumah India kutah S-400 Triumf hlan kim dawn

Kum 2018-a $ tluklehdingawn 5.43 hu inremna an ziah angin Russia chuan nakum hian S-400 Triumf (Triumph) air defence system a pek tur chu India kutah a hlan kim vek hman dawn niin chanchinbuten an tar lang.
“Russia hian India nen contract ziaka S-400 Triumph air defence system panga a pek tur chu kum 2026-ah a pe kim dawn a. Pali chu a hunah tak pek an lo ni tawh a, a pangana hi nakumah hlan an ni dawn a ni,” tiin Russian sorkar hnuaia mi, TASS news agency chuan a tar lang a ni.
A hmain chanchinbute chuan $ tluklehdingawn 5.43 (Rs vaibelchhe 40,000)-a indawrna hi US-in hreka a vauna karah October 5, 2018 khan ziah a ni tih an lo tar lang tawh bawk.
March, 2021 khan US Secretary of Defence Lloyd Austin chuan India-in Russia siam S-400 air missile system lei a tum hi sawi chhuakin CAATSA hrekna a tawrh phah thei tih a lo sawi tawh a ni.
US hian President Donald Trump-a hun hmasaa a ziah, Countering America’s Adversaries Through Sanctions Act (CAATSA) hi S-400 inleisak chungchangah inremna tihfel a nih hman loh avangin a takin a hmang zui ta rih lo bawk.
S-400 air defence missile hi May thlaa India-in Operation Sindoor a kalpui tum khan tangkai takin an hmang a, Minister of State Sanjay Seth pawhin Prime Minister Narendra Modi-a aiawha Moscow Red Square-a V-Day parade a chhimnaah Indian-te hnenah pawh a tangkai dan hi a sawi nghe nghe.
Seth-a hian India chuan missile system dang pawh lei a duh tih a sawi a, hmanraw tha zawk, S-500 missile system neih ve theih dan pawh a dap tih a sawi.
India hian May 7 khan April 22-a mi firfiakten Pahalgam an beihnaa mi 26 an thah phuba lak nan Operation Sindoor kalpuiin Pakistan leh Pakistan-occupied Kashmir-a mi firfiakte hmun eng emaw zat a kap a ni.
Pakistan pawhin chhang let zuiin ni li chhung ramria drone leh missile hmanga an inkah zui hnuah May 10 khan inkahhai an puang a ni.