Jaishankar leh US Secy of State Rubio inkawm

External Affairs Minister S Jaishankar-a chuan New York khawpuia 80th United Nations General Assembly session-a a tel rualin Thawhtanni khan US Secretary of State Marco Rubio-a a hmu a, H-1B visa avanga neuh neuh awm leh leh sumdawnna thila harsatna awmte an sawi dun.
Hruaitu pahnihte hi July thla khan Washington-ah 10th Quad Foreign Ministers’ Meeting-ah an lo inbe tawh a, a hmain January-ah an lo inkawm tawh bawk.
Tun tuma an inbiak hi President Donald Trump-a sorkarin Indian bungrua an lak luha chhiah a lak a tisan hnu leh H-1B visa application fee $1,00,000-ah a tisan hnua an inkawm lehna hmasa ber a ni.
“Tukinah New York-ah Secretary Rubio-a nen tha takin kan inkawm,” tiin Jaishankar-a chuan X-ah a tar lang a. “Kan inbiaknaah hian ram pahnih leh khawvel huap thil tam tak kan sawi a. A pawimawh zual bikah chuan indawr zel tha kan ti a ni,” a ti bawk.
New Delhi leh Washington hi sumdawnnaa inremna siam turin thil tulte an buaipui mek lai a ni a, Indian Commerce Minister Piyush Goyal-a hovin Indian aiawhte hi Washington-ah kalin an indawr chhunzawm dawn bawk.
President Trump-a’n July thla khan bungrua an lak luhah tariff 25% an lak thin chu India-in Russian tuialhthei a lei avangin hrem nan 25% dang a lak belh tur thu a puang a, hei hi a taka kalpui mek tawh niin ram pahnih inkara sumdawnnaah inrem lohna a thlen mek.
Inhmuhmawhna nei mek chungin tunah hian Bilateral Investment Treaty siam turin an indawr thar leh mek a, eibara ram inkawp nghet tak nih tumin thil an buaipui dun mek.
President Trump-a chuan a khawi lam ve ve mahin inremna siam turin ‘harsatna an nei dawn lo’ tih a lo sawi tawh a. Truth Social-ah Prime Minister Narendra Modi-a kaihhruaina fakin Ukraine-a muanna a awm theih nan a tawiawmnaah lawm thu a hrilh a. Modi-a pawhin India-US inkar tihnghet a duh tih a hrilh ve bawk.
Indian commerce & industry ministry chuan Office of the United States Trade Representative to India aiawhten September 16-a Delhi tlawha inbiakna neihah pawh ‘a tha lam hawia thil sawi’ a ni tih an lo puang tawh bawk.
Trump-a hian H-1B visa dilna man chu $1,00,000-ah tihsan a ni tih a puang zui leh a, hei hi an rama ram dang mi thiam bik nei hna thawka awm tam tak tan harsatna thlen thei a ni dawn a. Heng zinga a tam ber hi Indian an ni a, American technology sector-a thawk an tam hle bawk.
A hnuah White House chuan fee hi dil thar tur tan chauh a nih thu leh tuna visa nei sa tan chuan a nih loh thu a sawi leh bawk.
Jaishankar-a hian Pathianni khan New York thlengin tun kara UN General Assembly-ah a tel dawn a, ram dang hruaitute pawh a kawm kual nghal ang.
Inrinni hian assembly-a general debate-ah national statement a pharh dawn bawk a ni.