By: Familia Fanai Laltansanga
-- Advertisement --
America ram thuneitute chuan nikum June thla khan Unidentified flying objects (UFO) hi a awm tak tak em tih zir chiang tur, scientist 16 rual intel khawmna, NASA UFO Panel a din a. NASA UFO Panel chuan mi tam takin UFO nia an sawi thlalak leh video 800 lai an zir chian hnuah UFO anga an sawi tam zawk hi chu UFO ni lovin thil dang an ni tih finfiah theih a nih rualin an thil hmuh (sighting) zinga tlema zawng chu hrilhfiah leh sawi fiah theih loh a awm niin an sawi.
NASA UFO Panel chuan Nilaini (31.5.2023) khan Washington khawpuia an hmunpuiah darkar 4 awh vantlang inkhawm an buatsaih a, an hmalak dan leh hmalak zel an tum dan a puangzar a ni.
NASA chuan UFO tih aiah UAP (Unidentified anomalous phenomena) tih tawngkam chher chhuah a hmang thung. UAP chu a Sap tawngin hetiang hian an hrilhfiah a – sightings “that cannot be identified as aircraft or known natural phenomena from a scientific perspective”.
Mizo tawng chuan, “UAP chu thil mak dangdai miten an hmuh, science thlirna tlang atanga thlawhtheihna emaw thil hriat chian sa emaw ni bawk si lote hi an ni”.
NASA UFO Panel chairman David Spergel chuan, “Kan thil zir tawhte hi tawngkam khatin khaikhawm dawn ta ila, ‘thil finfiahna rintlak (higher quality data) kan mamawh a ni,’ tih hi a ni” a ti. A sawi awmzia chu khawvel dangah mihring anga finna nei an awm tih finfiahna kan la nei tawk lo a tihna ni awm tak a ni.
NASA hian UFO hi a awm tak tak lo tih a sawi fo a. Tun hnu hian an ngaihdan thlak danglam hretin UFO a awm tak tak em tih an zirchiang ta a, langtlang takin vantlang inkhawmte an ko ta zawk a ni.
Pentagon pawhin All-domain Anomaly Resolution Office a din a, an hotupa Dr. Sean M. Kirkpatrick chuan, “Vansangah khian khawvel danga awm, mihring anga finna nei an awm lo kan ti hulhual lo a, mahse an awm ngei a ni tih finfiahna engmah kan la nei lo a ni,” a ti.
An thusawi hi kan Pathian lehkhabu thianghlim, Bible thu nen pawh a inmil thlapin ka hria.