National Education Policy zirho

National Education Policy zirho
Sawrkar laipui Union Cabinet-in kum 2020-a a lo pawm tawh National Education Policy (NEP) zirhona ni hnih awh tur chu Thawhlehni khan Aizawlah hawn a ni.
A hawnna hmanpuitu School Education minister Lalchhandama Ralte chuan NEP-2020 bawhzui kawngah Mizoram sawrkarin nasa takin hma a la a; Covid hrileng karah pawh theihtawp an lo chhuah tawh tih a sawi. NEP-2020 chu department hrang hrang nghawng leh kaihhnawih a nih avangin thawhhona tha a tul tiin, symposium chuan rah tha a chhuah ngei a rin thu a sawi a. Ram chhung leh pawn zirna ngaituahin Mizorama zirna chu a standard a hniam bik loa, hmasawn ngaihna erawh a awm tih a sawi a ni.
NEP-2020 chuan thiamna tak tak pawchhuak a, zirlaiten chhawrtlak thiamna an neih a ngaipawimawh hle tih minister hian a sawi a. Zirlai naupangte chochhuaka phur taka an zir theihna’n school nuam leh chhenfakawm siam kawngah sawrkarin hma a la nasa tih sawiin, “Zirlaiten ngaituah thiamna (creative potential) an neih theihna’n te, zirtirtute dinhmun siamtha a, an zahawmna vawnghim thar turte in hma lak zel a ni. Taksa insawizawi leh games and sports lamah pawh nasa taka hma lak a ni a; skill development chu NEP-2020 thiltum pawimawh tak a ni,” a ti.
Sawrkarah mipuiin rinna an nghat ngam tawh chu lawmawm a tih thu Lalchhandama Ralte hian a sawi a. Sawrkar school-ah admit sen loh zirlai an awm tawh tih a sawi a ni.
Resource person hrang hrangten thupui thlansa hmangin zirtirna pein sawi ho nghal a ni a. Symposium hi vawiinah chhunzawm a ni ang.
He symposium hi Planning & Programme Implementation, Higher & Technical Education leh School Education department tangho buatsaih a ni.