National Games 2025-a bengkhawn hlawh tawk lo taekwondo thiam Mizo tlangval pathum! – Tpa Bunghai

National Games 2025-a bengkhawn hlawh tawk lo taekwondo thiam
Mizo tlangval pathum!
Infiamna huanga inkhawmpui lian National Games 2025-ah Mizoramin gold medal pahnih leh bronze pakhat tehtlawng kan la! Hei hian National Games-a Mizote hlimthla a pholang chiang hle. |an zual sauh a ngaihzia inhrilhnawn kan ngai awm lo ve.
Hetiang karah hian bengkhawn hlawh tawk lo, Aizawl tlangval pathumte’n gold an rawn hum haw nawn leh a, an thianho zin kawng hi haithet teh ang.
“Tun tum National Games 2025-a gold medal kan la nawn ve leh thei hi kan lawm hle,” tiin Armed Veng South tlangval Fela chuan inthlahrung zetin a sawi a; a thiante pahnih nena an thawhho that vang leh Pathian malsawmna bakah an thawhrimzia a sawi lang a, an coach R. Lalchhandama, Mission Vengthlang chungah a lawm hle.
Taekwondo huangah hian inelna (recognise competition) chi hnih Poomsae (mihring insual/inbei loa tih dan phung entirna) leh Kyorugi (mihring insual/inbei) a awm a; he’ng inelna chi hnih zinga pakhat zawk Poomsae-ah hian Aizawl tlangval pathum – H. Vanlalfela (Armed Veng South), Daniel Lalhumthanga (Chhinga Veng) leh Lalthlamuanpuia (Venghlui)-te hian kum 2019 atang khan Poomsae Team inelna hmachhawn turin hmachawp an nei tan a; he huangah hian individual, mixed pair, team hmangtea inelna hi kalpui thin a ni.
Anni thianho hian team game hi thlangin an inbuatsaih chho tan a; kum 2023 February a rawn inherchhuah meuh chuan National Championship-ah an inlan nghal thei der a, hemi tum hian bronze medal an hlawh nghal pang.
Mizoram sorkar hnuai atangin incentive cash award Rs. 40,000 theuh an thianho hian an dawng a ni!
National Championship an khelh hma hian Felate thianho hian All India University inelna Amritsar, Punjab-ah kum 2022 khan Mizoram University aiawha inlan tawhin, siver medal an dawng tawh bawk a ni.
Hemi ?tuma inelnaah hian gold medal la pha ngei tura ngaih ni mah se a thlengtu lam hian an kut atangin an chhuhsak tih theih hial khawpin hnehchhuh an ni.
Rs. 30,000 theuh an thianza hian Mizoram Sorkar (incentive cash award) atangin an dawng leh.
Hemi hnu hian hawikir tawh lovin tum li zet National Championship-ah gold medal anni pathum hian an hlawhchhuak a, India mipui maktaduai tam tak karah he’ng Mizo pathum, Aizawl tlangvalte hian kan hnam hi an lo tihmingtha tawh a ni.
Hmingthatna mai bakah an thiamna leh theihna hian sum a keng tel zel a, Mizoram sorkar hnuai atangin tum li zet gold medal an lak tawh atang hian Rs. 90,000 zel vawikhat gold medal an lakah hian mi pakhatin an dawng.
He’ng National Championship tum li gold medal an lak tawhah hian mi pakhatin Rs. 3,60,000 an petin an hnek chhuak thei tlat. Sorkar lam hian an tha a tiphur bawk a, tha an thlah zui lo chiang hle.
An thianza hian kum 2023, October ni 26 atanga November ni 9 inkara National Games, Goa-a nghahah khan Mizoram aiawha inlanin, an ta ang deuh thawa an hlawhchhuah mawlh mawlh thin gold medal bawk chu an awrh zui leh a, hei hi National Games lama an hnuhma hraw intanna a ni.
He inelnaa gold medal an hlawh leh tak avang hian, Rs. 6,00,000 (nuai 6) lawih an pathum hian Mizoram sorkar atangin incentive cash award an dawng leh theuh.
India rama an hnuhma hraw leh hrawl tak avang hian kum 2024 November ni 30 atanga December ni 4 chhung khan Poomsae, World Championshionship-ah an inlan ve thei ta hial a!
Hemi tum hian inelna hmun Hongkong-ah hian vanduaithlaktakin, Daniel Lalhumthanga chu a ban ruh a tliah avangin a kal ve thei ta lo a, a aiawhtu Samarjeet Chakra (Odisha) chuan beisei a phak tawk loh avangin Round of 32 pel lovin an tla!
He inelna atang hian Mizoram Sorkar atang bawkin incentive cash award Rs. 3,00,000 an dawng dawn a ni.
Kum khat dana huaihawt tlangpui National Games chu kumin hiam Uttarakhand-in a thleng a, Felate thianho hi inlan lehin, Mizoram sorkar atangin Rs. 6,00,000 lak tur neiin gold medal an rawn hawn leh.
He super trio hian ngaihven leh ngaihsak hlawh tawk lo mah se chanchin tha an thlenna thin an ke chheh a danglam phah ngai lo.
Poomsae inelna atanga sum an hlawh zat hi chhiar tham fe a ni nang a, fak hlawh tawk lo val erawh an ni chiang ngei mai! An hlawhtlinna thawm hi a dai riau zel!
An chenna veng leh an tui tlanna mualah tal he’ng tlangval pathum, kan hnam hmel timawia tihmingtha thinte hian tuntumah chauh tal hi chuan an puala kut benna tur hun bik buatsaih ngei teh se – an phu tlat hek le…