National Girl Child Day-ah BBBP kum 10 tlinna lawm

Ramchhung hmun dang rualin Beti Bachao Beti Padhao scheme kum 10 tlin leh National Girl Child Day 2025 chu Zirtawpni khan Mizoram district hrang hrangah hman a ni a. Aizawlah chuan chief secretary Khilli Ram Meena hoin State Hub for Empowerment of Women (SHEW), Directorate of Women & Child Development buatsaiha hman a ni.
Beti Bachao Beti Padhao (BBBP) hi 2011 chhiarpuiah India rama nau piang zingah mipa aiin hmeichhia an tlem ta lutuk tih hmuhchhuah a nih avang leh, hmeichhe fa duh lohna a nasat em avanga hmeichhe fate humhimna atan leh thlamuang taka inthliarhranna tawkloa an nun chhoh theihnan sawrkar laipuiin kum 2015-a scheme a kalpui tan a ni.
Chief secretary chuan BBBP scheme hmalakna hlawhtling tur chuan department pathum – Social Welfare & Tribal Affairs, Women & Child Development, Health & Family Welfare leh School Education thawhhona a pawimawh tih a sawi a. India ram pum nen khaikhinin, Mizoram child sex ratio dihmun a that rualin, hmasawn ngaihna lai thenkhat a la awm tih a sawi. He scheme hnuaia hma lak tawhna zawng zawngah thawktu hrang hrangte chungah lawmthu a sawi bawk.
Inkhawmah hian academics (STEM) leh sports lama zirlai hmeichhia hlawhtlinna changte hnenah chawimawina hlan a ni a. Kalkhawmten hmeichhe naupangte humhim a, thlamuang taka an seilen a, zirna leh kawng hrang hrangah thleibikna tawk loa an nun an hman chhoh theihnan hma la turin thu an tiam a ni.
BBBP kum 10 tlin lawmna pual hian district leh block level-ah inzirtirna leh inhrilhriatna kalpui zui a ni anga, intihsiakna hrang hrang buatsaih a ni dawn a ni.