National Girl Child Day pual

National Girl Child Day pual
Serchhip ICDS Project huaihawtin National Girl Child Day leh BBBP Scheme kum 10 tlin lawmna pualin Ningani khan Serchhipah kawng zawh a ni a. Thupui atan “Walk for the Girl Child” hman a ni.
CDPO Serchhip Caryll Lalpari sawi danin, National Girl Child Day hi kumtin January 24-ah hman thin a ni a. Kuminah hemi pual bakah BBBP Scheme kum 10 tlin lawmna ni bawkin a thil tumte chian lehzualna atan block level-ah hun hman tura tih a ni. Anganwadi Centre tinah thutiam sawi niin, thing phun tum a ni.
Kawngzawhah hian WCD hnuaia office hrang hrang- DPO office, OSC, Shakti Sadan leh Anganwadi worker leh helper-te leh DCPU office staff-te an tel.
District Hub for Empowerment of Women, Women & Child Development leh Education department Mamit District chuan Hmeichhe Naupangte Ni pual hian Ningani khan Mamitah high school zirlai hmeichhiate tan ni khat awh volleyball inelna an buatsaih.
Inelna hi infiamna kawnga hmeichhiate hma an sawn zelna tura buatsaih niin, kawngzawh leh aurual nghal a ni. Inelnaah hian Govt Mamit HS-II chu champion-in, pahnihna New Mamit High School, pathumna Presbyterian English School, palina Govt. Mamit High School an ni. Govt. Mamit High School-II ami Lalrindiki chu player tha ber lawmman hlan a ni a. Inelnaa telte hian sumfai, nomawi, infiamna hmanrua leh lawmpuina thuziak an dawng a ni.