National Protest Day hmang dawn

India rama kohhran inzawmkhawm pawl – National Council of Churches in India (NCCI) hnuaia kohhran ho chuan vawiin, August 10 hian National Day of Prayer & Protest an hmang dawn a. India rama Dalit Kristiante leh Dalit Muslim-te enhran leh thliarbik an nih duh lohna lantir nan he hun hi hman thin a ni.
Kum 1950 khan dan pakhat, ‘The Constitution (Scheduled Castes) Order’ pass a ni a; chu chu ‘Presidential Order 1950’ tia sawi thin a ni bawk. He danah hian ‘Hindu sakhaw betu ni lo chu scheduled caste an ni thei loang’ a inti a. 1956-ah he dan hi siamthat hlek (amend) niin, Sikh sakhaw betute an rinlut tel a. 1990 khan siamthat leh niin Buddhist sakhaw betute rin luh an ni ve leh a ni.
Hetihlai hian vawiin thlengin Dalit Kristian leh Dalit Muslim chu scheduled caste an la ni ve thei ta lo a. Hetianga sakhua avanga inthliarna awm hi duh loin, NCCI chuan kumtin August 10-ah National Protest Day a hmang thin a ni.
August 10 hi India President-in order a sign ni a nih avangin Protest Day atan hian hman a ni a. Tawngtairual bakah lungawi lohna lantirin hun hman thin a ni. Dalit Kristiante leh Dalit Muslim-te hi scheduled caste-ah an awm ve theih nan tawngtai thin a ni.
Mizoram Presbyterian Kohhran pawh NCCI-a member a nih avangin National Day of Prayer & Protest hi hmang turin NCCI atanga hriattirna dawn a ni a. Synod Officers’ Meeting chuan August 10 (Inrinni) zana kohhran inkhawmah hemi puala tawngtai tura hriattirna tualchhung kohhranah a thawn chhuak a ni.
Hei bakah hian, Synod Office-a thawktuten chuan hemi pual hian office kal ni, August 9 (Zirtawpni) khan hun an hmang a ni.