National Space Day hman tur pualin Aizawlah workshop nei

India thla lem, Chandrayaan-3 hlawhtlinna denchhenin thla leilung a rah ni – August 23 chu Prime minister Narendra Modi chuan National Space Day ah a puang a. A lawmna chi khat atan Irrigation & Water Resources department bultumin Zirtawpni khan Aizawlah workshop neih a ni.
Sawrkar laipui Ministry of Jal Shakti chuan Mizoram telin state thlan bik 11-ah National Space Day hmang tur hian ruahmanna a siam a, a lawmna pui ber erawh August 23-ah New Delhi-a hman tur a ni. Ministry hian National Space Day lawm nan water resources lama space technology kan hman tangkai dan workshop buatsaih tura a tih angin, Mizoramah chuan “Emerging Space Technology Application in Water Resources Management” tih thupui hmangin I&WR department, Pachhunga University College leh Indian Institute of Technology Roorkee tanghoina an buatsaih a ni.
Hmanpuitu I&WR minister PC Vanlalruata chuan, workshop-in a tum ang taka space lama thiamna chu tangkai taka hman zel theih a nih a beisei thu a sawi a. Space lama thiamnain kan ram leilunga tui awmte hman tangkai kawnga min puih dan tur bakah heti lama I&WR department hmalakna kal mek thenkhat – Real Time Data Acquisition System (RTDAS) leh State Water Informatics Centre din tum a ni dan a sawi bawk.
Workshop-ah hian IIT Roorkee, National Institute of Hydrology, North Eastern Regional Institute of Science and Technology (NERIST), North Eastern Space Application Centre, Survey of India, Central Water Commission, Central Ground Water Board, Pachhunga University College leh Irrigation & Water Resources Department atangin mithiamten hun an hmang a. A kaihhnawih sawrkar department aiawh leh zirlai engemawzat an tel a ni.