National Women’s Hockey League: Bul \an fuh Mizo team tlawm leh rih!

National Women’s Hockey League:
Bul tan fuh Mizo team tlawm leh rih!
Jharkhand starte khawpui ber Ranchi-a under 21 tournament khelh mek National Women’s Hockey League 2024-25 (Final Phase)
-ah Thawhlehni zan khan Mizoram chuan hnehnain bul an tan a, a thlengtu leh team tha tak ni bawk Jharkhand lakah 2-1 hnehna changin, Nilainiah India women hockey-a roreltu ni mek Haryana an hmachhawn zui leh a, 2-1-in an chak lo ve thung.
Mizo nulate’n an bultanna inkhela an hneh tak Jharkhand kha India women hockey-ah na na na chuan age group/category-ah pawh tha em em an ni a, tournament thlengtu an nih bawk avangin Mizoram lakah pawh rinkai zawk an ni lo thei lo a, mahse, hun pawimawha Larinpuii goal hnih thun hmangin Mizo nulate’n hnehna an chang hlauh a ni.
Kha match-ah khan goal khung ve lo mah se Mizoram jersey no. 17 Vanlalrinhlui chu player of the match-a thlan a ni.
Mizoram hian an match hnihnaah Nilaini chawhma khan India women hockey-a roreltu Haryana an hmachhawna zui leh a, hlauhthawn ruk ang ngeiin Mizo team an tlawm!
Mizo nulate hian an khel tha khawp mai; Haryana goal khung hun kha 3rd quarter-a minute 1:27 chauh a awm tawh lai leh 4th quarter-a minute 1:30 chiah a awm tawh laiin a ni a, hun a tawp hman teuh nen Mizo team-in goal an hum zo lo tlat kha a pawi ta a ni.
Haryana laka Mizoram goal neihchhun hi 4th quarter-a Vanlalrinhlui khung a ni.
A hma zanah Mizo nulate khan a thlengtu team lakah game hautak lutuk leh thahrui heh em em an khel a, chumi nghawng chu an khelh danah pawh khan a hmuh theih.
Haryana erawh an khelh hun Thawhlehni chawhma lam daih tawh a nih bakah an bultannaah khan game harsa lo tak an khel bik a; Mizoramin a ni zawna an khelh team pahnihte kha an hraw dun em a, fixture inrem dan an tuar ti pawhin a sawi theih awm e.
Niminah an awl a, vawiin tlai dar 3 hian Manipur an tum leh dawn a, Mizo nulate hi Metei team laka rinkai zawk ni mah se result sawilawk theih a ni lo.