Natna khirh vanga aikal laten invalid pension dil a tul dawn – Health minister

Mizoram sawrkarin a hnuaia thawk zinga aikal lak tihtawp a tumna kawngah natna khirh bik vanga aikal la lo thei lote tan invalid pension an dil a tul dawn tih Health minister Lalrinpuii chuan a sawi.ZPM Southern Hqrs. Lungleia thu a sawinaah ZPM hruaitu ni bawk Lalrinpuii chuan Tunhnaia Council of Minister thukhawm chuan sawrkar hnathawk aikal lak khapna dan a pawm tih sawiin, engmah ti thei loa awm, natna khirh tuarte chuan invalid pension an dil a tul dawn a, an aiawh tur a rang thei ang bera sawrkarin a lak tur thu a sawi. Aikal lak khap a nih avangin, an party mite chu an chhungte sawipui lo turin a ngen nghal a ni.
Sawrkar damdawi ina doctor awm lohnaah doctor an dah deuh vek ta tih Health minister hian a sawi a. Civil Hospital Aizawl lun lutuk tih ziaawmna atan District Hospital ho thuamthat tial tial an tum tih a sawi. CSS hnuaia a nghet loa thawkte chu a tahtawla dah ngheh an nih tur thu sawiin, health worker engemawzat lak turah pawh a nghet loa thawkte dah ngheh chhoh an tul dawn tih a sawi.
Lung natna vei kan tam ngaihtuahin, sawrkarin lung zaina khawl ala nei lo chu, neih thuai theihnan hma lak a ni tih a sawi a. Hemi atan hian lung doctor thiam tak, Delhi ami chu Zoram Medical College-a thawk turin sawmchhuah an tum mek tih a sawi.
State Organ and Tissue Transplant kalpuiin, Mizoramah kal (kidney) thlak a nih theih nan tan an la mek a, reilote ah tihfel theih mai an inbeisei tih a sawi bawk.
Festival awmsa thlak a, a thar hman tum chungchangah a mimal takin beih a tawk nasa niin Tourism minister ni bawk Lalrinpuii hian a sawi. “Mi hrang hrang hnen atanga thurawn ka dawnte ngun takin ka ngaihtuah a, Lunglei tana thutlukna siam ka ni a, thutlukna dik niin ka hria. Lunglei chauh ni lo, district hrang hrangah pawh tourism tihhmasawnna kawnga tangkai tur chi event liantham huaihawt kawngah hmalakna kalpui zel a, tunlai mila inherrem zel a tul,” a ti. Champhaiah pawh Hnahsin Festival huaihawt tum a ni tih a sawi.
Anthurium Festival tihtawp chungchangah sawrkar hmasa thiltih a nih vang ngawta duh lo niloin, tun dinhmunah he Festival hian Mizote thinlungah hmun a chan thuk tawh meuh loh avang leh, chhan hrang hrang avangin ‘Leitlangpui Music Festival’ neih tha zawka a hriat thu a sawi a ni.