Naupai laia hritlan?

Naupai laia hritlan?
Nau a pai laia nu-in viral infection ho tê, hritlang satliah pawh a neih hian a pum chhunga naute awm thluakah a tha lo zawnga nghawng neiin, nu pum chhunga naute thluak than a tibuai thei niin mithiam ten an sawi.
University of Southern California, US hnuaia Keck School of Medicine Assistant Professor leh he zirchiannaa an hotu ni bawk Alexandre Bonnin chuan, “ Nuin nau a pai tan atanga kar 12-na thleng chhunga infection naran, hritlang te pawh a neih chuan a naupai chuan kum 15 hnuah schizophrenia (thluak lam natna ti mai ila) a neih theihna risk chu a let thumin a sang a ni. Nuin nau a pai laiin hritlang ta se a fa chuan schizophrenia a nei ngei ngei dawn tihna a ni lo va, mahse, a risk hi a let thumin a sang zawk a ni,” a ti.
Zirchianna neitute hian chaihchim no pai lai immune system chu viral infection, hritlang ang chi an neih laia a awm dan an zirchiang a, hei hi mihringah nuin a naupai tan atanga a kar 12-na thleng nen a intluk niin an ngai.
Zirchianna neitute chuan nuin nau a pai laia a immune system-in viral infection a dolet a tul chuan, infection nasa vak lo pawh ni se, a naupai chu a thluak leh central nervous system-ah thil fel lo a awm palh thei tih an hmuchhuak niin an sawi a, immune system tiche tu tryptophan level a lo sang a, chu chuan placenta-in serotonin a tichhuah hnem tir a, chu chuan naute thluakah serotonin concentration a lo tisang ta thin niin an sawi.
Bonin chuan, “Serotonin hi nu pum chhunga nau insial lai thluak than nan a pawimawh a, thluak than dan a tidanglam thei. Placenta atanga serotonin level a san chuan nau insiam lai thluak chuan ama tawkin serotonin neurons a tichhuak ve leh a, a chhan chu thluaka receptor-in thluakah serotonin a tam lutuk ni a a hriat vang a ni. Chu chuan harsatna a thlen thei a, a bikin thluak hmalam chu a nih tur angin a insiam loh phah thei ta a ni,” a ti.
Scientist-te chuan nau insiam lai thluak than a buai loh nan enzyme chikhat tryptophan level tisanga serotonin siam thei hmanga enkawlin, placenta-in serotonin a siam chhuak tam lutuk tur a block thei a, chu chuan nau insiam lai thluak insiam chu a nih dan tur pangngaiin a insiam tir thei niin an sawi bawk.
He zirchianna chungchang hi The Journal of Neuroscience-ah a tarlan a ni.