Naupang chunga pawikhawihna thila court mamawh leh tul thlen

Mizoram State Commission for Protection of Child Rights (MSCPCR) leh Child Welfare Committee (CWC) Aizawl district hotute chuan District & Session Judge Aizawl Judicial District leh Fast Track Special Court (POCSO) hnenah naupang chunga pawikhawihna thlenga a tuartu naupangte himna leh danin a humhalhna anga mamawh leh tulte an thlen.
Inkawmhona hunah hian Mizorama naupangte dikna leh chanvo humhalh kawngah thawhhona tha an neih a tul tih an sawi a. MSCPCR chu danin POCSO dan leh a kaihhnawih kenkawh kawngah thuneihna a pe a, he dan hnuaia a tuartu (victim) ten harsatna chi hrang hrang an tawh thin chu District & Sessions Judge hnenah hrilhhriat a ni.
MSCPCR chuan POCSO Act-in a sawi anga pawikhawihtu thubuai nei mekten court room-ah emaw court compound-ah emaw a tuartu naupang nen hmaichhana inhmuh a khap tlat a, a tuartu naupang thu leh hla lak a tul a nih chuan video emaw voice recording emaw hman nise; a tuartu naupangin amah khawihtu a hmuh emaw a finfiah dawnin darthlalang langtlang theilo (one sided mirror) hman ngei nise, in-camera (a case kaihhnawih chiahte awmnaah) in POCSO case hi kalpui thin nise, tih te an sawi a ni.
Internet social media-a naupang hming, nihna leh thlalak tarlan a ni leh thin chu Commission chuan pawi a tiin, hetianga tarlan hi POCSO dan kalh leh hrem theih an ni tih an sawi a. Court atanga chanchinbumi leh mi nawlpui hriat tur information pek chhuah kawngah uluk taka thlitfim hmasak thin nise, an ti bawk. POCSO case la chinfel loh (case 272 upto February 2023) chu chak zawka chinfel a nih theih’nan court-in chak takin hma la se tih chu Commission duhdan a ni tih an hrilh a ni.
District & Sessions Judge Vanlalenmawia chuan District Court-a POCSO dan hnuaia pawikhawihna tuartu naupangte leh naupang dang, nu in case hrang hrang avanga court-a an lo hruai telte lo buaipui tur child welfare officer /probation officer thutna room/ hmun an pek theih tur thu a sawi.
POCSO Victim Compensation Scheme chungchang pawh sawi ho niin, pawikhawihna tuartu naupangten a hun taka compensation an dawn theihna turin theihtawpa hma lak ho nise, an ti. District & Sessions Judge ho hian POCSO case ngaihtuahna court room hrang hrang leh facility (one-sided mirror) te en ho a ni.
MSCPCR team hi chairperson Dr C Lalsangzuala’n hoin, Commission member pahnih – Dr Julie Remsangpuii Fambawl leh K Malsawmzuali bakah hotu dangten bakah CWC Aizawl District atangin member K Lalremruati a tel a. Aizawl District Court atangin Fast Track Special Court (POCSO) presiding officer pahnih – P Singthanga leh R Lalthazuala, PC Act special judge Dr HTC Lalrinchhana, chief judicial magistrate Lalrochami Ralte, senior civil judge H. Lalduhsanga leh special public prosecutor (POCSO) Rosemary te an tel a ni.