Naupang dikna chanvo humhalh hi mitin mawhphurna – SW minister

Naupang dikna chanvo humhalh hi
mitin mawhphurna – SW minister
Naupang dikna chanvo humhalh chu mitin mawhphurna a ni a, chu mawhphurhna chu puitling zawkte, a bikin nu leh pa tam takin kan hlen lo fo thin tih Social Welfare minister Er Lalrinawma chuan a sawi.
Mizoram State Commission for Protection of Child Rights (MSCPCR) buatsaih lehkhabu “Naupang dikna chanvo kaihhnawih inkaihhruaina” (Child Rights Information & Resource Directory) chu Social Welfare & Tribal Affairs minister hian Zirtawpni khan a tlangzarh a. Naupang dikna chanvo humhalh chu sawrkar leh dan kengkawhtute kut chauh niloin, mitin mawhphurna a ni a, naupangte dikna chanvo humhalh kawnga penchhuak turin mipui a sawm tih a sawi.
Naupang enkawl leh venhim chu puitling zawkte mawhphurna a nih laiin, chu mawhphurna chu nu leh pa tam takin kan hlen thin loh avangin, naupang tam tak dikna chanvo chu rahbeh leh palzutin a awm fo thin tih a sawi a. Naupangte tha taka an seilen theihna turin chhungkua leh khawtlangah hma thar chhuah zel a ngai a, a bikin chhungkaw inenkawlnaah nu leh pa ten tan lak thar a ngai tih a sawi. “Mizoramah naupang hlamchhiah, fahrah, pawngsual leh khuaikhem tawk an awm fo a, mi tam takin tanpui duh thin mah se, hmalak dan an hre lo fo thin. He lehkhabu hian nasa takin min pui thei dawn a ni,” a ti.
Fa neih tam kawngah pawh tan lak a ngai hle Er Lalrinawma hian a sawi a. Pun chak a pawimawh rualin, fa neih ringawt a tawk loa, anmahni enkawl leh an dikna chanvo venhim kawngah theihtawp chhuaha tan la thar turin mitin a sawm tih a sawi a ni.
Lehkhabu tlangzarh hi hlawm lian pahniha then a ni a. Thenkhatnaah danin naupang a bika enkawl leh venhim ngai a tarlante an awm a, then hnihnaah naupang tanpuina pe thei te tarlan a ni.