Naupang leh raipuar hri danna pek dan thlirlet

On Dec 11, 2023 18 0

Kolasib District Task Force on Immunisation (DTFI) leh Kolasib District TB (Tuberculosis) Forum chu an chairman, district bawrhsap John LT Sanga hoin Zirtawpni khan an thukhawm.
Health department-a thawktute, education, women & child development, LAD, RD leh I&PR department aiawh, NGO leh MJA aiawh leh TB champion-te an tel a. DTFI secretary, Kolasib district senior chief medical officer Dr RK Lalthlamuana’n DTFI hmalakna report pein, District TB officer, deputy CMO Dr Zonunsiama’n District TB Forum hnuaia hmalakna report a pe bawk. Kum kal meka task force leh forum hnuaia hmalakna thlir hoin, hmachhawp awmte leh hmasawnna tura rawtnate sawi ho a ni.
He hunah hian hri danna (vaccine) hmanga ven theih natna hrang hrang vanga thi an awm tawh loh nan ngawrh lehzuala hma lakna – Intensified Mission Indradhanush 5.0 bawhzui dan report pek a ni.
Central TB Division atanga Kolasib district-in x-ray khawl a dawn chu District Hospital Kolasib-ah bun a nih thu leh kumin October 18 atang khan hman tan a nih thu report a ni a. Kumin August 19 khan x-ray khawl hi bunin, a thlalak her chhuahna CR system chu October 17 khan vuah a ni.
Nakum World TB Day, March 24-a TB awm lohna khua (TB Free Village) lawmman sem atan Kolasib district-a khaw tam thei ang ber TB Free Village-a puan a nih theih nan hma lak a nih dan sawi ho a ni bawk.
TB Free Village ni tur hian kum khat (January – December) chhungin khaw khata mihring cheng zat azirin mi 1000 zelah mi 30 tal endik tur niin, mi 1000 zelah TB vei nem ngheh mi 1 aia tam an ni tur a ni loa; TB vei enkawl hlawhtlin 85% aia sang tur niin, TB veite chuan NPY leh Nikshay Mitra tanpuina an dawn ngei a tul. Heng tehna atang hian tun dinhmunah Kolasib district-ah TB Free Village ni thei khaw 15 a awm a ni.

# Kumin August leh November inkar (thla 4) chhungin Kolasib district-a Sub-Centre 4 hnuaia hmun 9-ah naupang kum 5 hnuailam leh nu nau paite hnenah hri danna pek beihpui thlak a ni a. Naupang kum khat hnuailam target 318-ah 285 pek niin, kum 1-2 inkar target 151-ah 85 leh kum 2-5 inkar target 120-ah 54 pek an ni. Raipuar hri danna pek tur target 94 neih a nih laiin, raipuar 119 pek an ni.
# Kumin December ralhmaa sentut (measles) leh sentutfang /nithum sentut (rubella) natna umbo tura beihpui thlak mekah kumin April – October inkar (thla 7) chhungin nausen thla 9 leh thla 12 inkar MR (measles-rubella) vaccine pek tur target 854 atangin 820 (96.02%) chu MR1 vaccine pek niin, naupang thla 16 leh kum 5 inkar MR vaccine pek tur target 854-ah 748 (87.59%) chu MR2 vaccine pek an ni.
# MR umbo turin MR1 leh MR2-ah 95% ve ve phak a ngai a, MR hrileng (block 1-a MR vanga damlo 5 awmna chin) leh MR vanga thihna a thlen loh a tul a. Kolasib district-ah MR hrileng leh MR vanga thihna hi la thleng loin, vaccine target 95% pawh khum theih beisei a ni. Anganwadi Centre hrang hrangah MR vaccine pek ngawrh taka kalpui a ni.
# Kolasib district-a naupang kum 10 leh tleirawl kum 16 tan sakawr ekhrik (tetanus) leh hrawk na (diphtheria) hri danna – Td vaccine pek kalpui mek niin, April – October 2023 chhung hian Td10 1065 (56%) leh Td16 899 (45%) pek a ni tawh.
# Hri danna kalpui sa pangngai kalpui dan uluk taka vil niin, target tlin turin beihpui thlak reng a ni. Weekly surveillance kaltlangin measles-rubella, polio leh diphtheria leng a awm leh awm loh thlithlai reng niin, hri kai nia rinhlelhte chu rang taka enfiaha vil zui zel an ni.
# Kolasib district-ah hri danna hmanga ven theih natna vei hriat chhuah leh nemngheh (confirmed case) a awm rih lo.
# April – December inkar chhungin Kolasib district-ah ngawr (TB) vei rinhlelh khak (sputum) endik 1492 atangin TB vei nemngheh 144 an awm a. Mi 62 chu enkawl dam tawh niin, enkawl lai 82 an awm. TB leh HIV vei kawp 14 awmin, TB vei enkawl laia thi 3 an awm.
# District TB official-te chuan TB hrik en leh damlo enkawlna chu sawrkarah a thlawn vek a nih bakah Nikshay Poshan Yojna (NPY) hnuaiah damdawi ei chhung zawng thla tin Rs. 500 pek an ni a, inenkawl zawh hnu ah Rs. 750 pek thin an ni.
# TB veiten an inenkawl chhunga chaw tha an dawn theih nan mi inphal (Nikshay Mitra) te hnen atangin tanpuina sum dawn thin a ni a. Tun dinhmunah Kolasib district-ah Nikshay Mitra (donor) 35 awmin, damlo 35 tanpui an ni.