School lama discipline khauh taka hnuaia enkawl zirlai naupang te chuan zirna in strict loh deuha zirlai, an kum rualpui ta aiin dawt sawi an awlsam zawk niin mithiam ten an sawi.
McGill leh Toronto University a mithiam pahnih Victoria Talwar leh Kang Lee ten zirchianna neiin, veng khata naupang, school inang loa kal te chu an nungchang an zirchiang a. Naupang kum 3 leh kum 4 inkarah zirchianna hi neiin, inhrem uarna school-a zirlai naupang te chuan inhrem uar vak lohna school zirlai te aiin dawt an sawi awihawm thiam zawk tih an hmuchhuak niin an sawi.
Private school pakhatah chuan hmawlha invuak, in-ben leh in-piai te chu inhrem nan an leklam hle a. Naupang te chu pencil leh lehkhabu theihnghilh vang mai mai te, class room-a bengchhen vang te pawhin hetiang hian hrem an ni thin.
Private school pakhat ve thungah chuan naupang te chu kut thawhin an hrem ngai lova, tawngkaa hauh leh an infiam hun tih tlem sak te, a timawh zual deuh re chu principal office-ah te an tir thin.
Heng school pahniha kal, veng khata cheng ho si te nungchang chu an zirchiang ta a ni.
Naupang te chu a mal malin game chi khat, inrin dik siak (guessing game) an kehlh pui a. Naupang te chu room-ah anmahnia awm tirin, en ru miah lo turin an ti a. Naupang te chuan an en ru deuh vek. An en ruk leh ruk loh an zawh leh chuan inhrem nasatna school-a zirlai te zawng zawng deuhthaw chuan dawt an sawi a, chutihlaiin kut thawha inhrem ngai lohna school-a kal te zingah chuan hmun thuma thena hmun khat chauhin dawt an sawi thung.
Inhrem nasatna school-a zirlai te chuan dawt an sawi mai bakah an dawt sawi dan pawh a awihawm bik niin zirchianna neitu te chuan an sawi.
Kang Lee chuan, “Inhrem nasatna hmuna awm thang naupang te chuan hrem an pumpelh theih nan kawng dap dan an hre bik riau a, a dinhmuna zira dawtsawi pawh an awlsam zawk a ni,” a ti.
Naupang thunun nasat lutukin dawt sawi awlsam
Get real time updates directly on you device, subscribe now.