Nausen thi 9 awm tawh

Sawrkar kum chhiar anga chhutin nikum chhung khan Khawzawl district-ah nausen thi 16 an awm a; kumin kal mekah 9 an awm tawh.
District bawrhsap K Vanlalthiana kaihhruaiin Khawzawl district-a nu leh nau chunga thihna leh nausen thihna thleng thin tih tlem dan ngaihtuahin Thawhlehni khan thutkhawm a ni a. Hetiang chhiatna thleng thin laka inven dan leh thihna a lo tlem zawk theihnan zir hoa hma thar lak tha an tih thu an sawi.
MHIP leh ICDS lamin theihtawp chhuahin mipuiah inzirtirna kalpui se an ti a. An district chhunga damdawi in pawh tichangtlung zual tura hma lak nise an ti.
Thutkhawmah hian Sub Hqrs. YMA, Sub Hqrs MHIP leh District MUP aiawh bakah District Hospital Khawzawl medical superintendent leh senior medical officer an tel a. Powerpoint Presentation hmangin Maternal & Infant Death chungchang inhrilhfiah a ni.
Report danin, 2023 April atanga March 2024 chhungin nau piang 284 awmin mipa 149 leh hmeichhia 135 an ni a, nausen thi 6 leh pian hlima thi 10 an awm. April – July 2024 chhungin nau piang 72 awmin mipa 45 leh hmeichhia 27 an awm a, naupang thi 1 leh nausen thi 8 an awm.