Nawrchhuah ngaiin CEM tur rawtna pawm
Lai Autonomous District Council-a chief executive member tura rawtna chu pawm loha a awm reng hnu ah Central Young Lai Association-in Republic Day boycott-a a vau a, CEM tur tifel tura an nawr hnu ah January 25 (Pathianni) tlai khan tihfel a ni.
LADC 12-naa CEM tur hian MNF leh Congress thawkdun United Legislature Party chuan Lawngtlai Chandmary bialtu MDC, MNF member C Lalsawmzuala an rawt a. Hun engemawchen a inchiah a ni. Thudawn danin a pawmsaktu tur larsap hi Pathianni khan a zinna atangin a lo haw a, hemi hnu hian CEM tura rawtna thlen hi pawmin District Council & Minority Affairs secretary-in hriattirna a tichhuak a. CEM atana ruat hian thlawptu a neih dan hi January 29 khian fiah tura tih a ni .
Larsap hian chuan protem chairman atan Lawngtlai College Veng bialtu MDC, MNF member C Hrangthianga a ruatna pawh January 25 vek khan tihchhuah niin, ruahman lawk dan chuan January 28-ah chairman tur chu protem chairman kaihhruaia neih a ni ang.
2025 December 9-a12th LADC inthlanpui result puan a nih hnu ah party mala sawrkarna siam thei an awm lo a, party ho an indawr kual a, sawrkarna siam thei mai tura ngaih pawh an inhnu chhawn sak leh zak zak a, inthlan laia thawhdunna siam MNF leh Congress hian United Legislature Party dinin sawrkarna an siam theih thu hi an thlen leh ta a ni.
Hemi hnu pawh hian larsap-in sawrkarna siam tura a sawm mai tak loh avangin Central Young Lai Association chuan LADC-ah sawrkarna siam thei an awm reng laia sawrkar a piang mai thei lo chu hriatthiam har an tih thu sawiin, January 22-a Central Executive Committee thukhawm chuan January 24 tlai dar 4.00 thlenga sawrkar a pian leh pian loh an ngaihchan tur thu leh, an beisei anga sawrkar a piang lo a nih chuan na zawka thuneitute nawr tha an tih thu an sawi a ni.
An hun tiam a ral hnu ah pawh an thil ngen hi tih hlawhtlin a nih loh avangin Central YLA chuan January 26 zing dar 5.00 atangin tiamchin awmloin Lawngtlai district-ah total bandh neih nise tiin a rel a. Hetianga sawrkar a pian theih dawn tak avang hian total bandh neih an tum pawh hi an thulh zui ta a ni.
United Legislature Party-ah hian MNF MDC 8 leh Congress MDC 7, an vaiin member 15 an awm a. LADC-ah hian elected MDC 25 an awm a ni.