NBA Champion Celtics

NBA Finals thawh ngana chu thawhleh zing khan khelh a ni a, game hmasa pathuma chak zawn Boston Celtics chuan point 106-88 in Dallas Mavericks an hneh a, ropui takin an champion. Champion thar Celtics hi NBA-ah vawi 18 an champion na a ni a, LA Lakers nen an record siam dun kalsanin, NBA-ah champion ngun ber an ni.
Final thawh nganaah Celtics an khel tha viau a, quarter hnuhnung pahnihah an hnufual ve zeuh tih loh chu quarter dang pathumaah chungnung zawk an ni vek. Game linaah chiang zeta an tlawm vangin Celtics hi insiamthat ngei tumin tan an khawh a, an thawkrim sauh bawk. Game nganaah Mavericks chelh rual lohin an inlan zui ta chiah bawk. Quarter khatnaah Celtics hi point 9 in an chungnung a, quarter hnihnaah point 11 a chungnung zui lehin, point 20 zeta hmahruai chungin chawlhlawk an hmang.
Chawlhlawk hnu Dallas Mavericks an khel tha ve thung a, an khingpuite lehthal ngei tumin tan an khawh. Champion tura tlawm thiang tawh lo Mavericks hi quarter thumnaah point hnihin an chungnung a, quarter hnuhnung berah point khatin chungnung zui leh bawk mah se an khingpuite hi point 18 zetin an umphak zo lova, champion an beisenna chu a zam ral zui ta a ni.
A vawi li nan Dallas Mavericks an hneh tum hian Celtics tan Jayson Tatum chuan point 31 a thawkchhuak a, assist vawi 11 a nei tling bawk. Celtics player pawimawh Jaylen Brown chuan an champion theih nan point 21 a thawh ve bawk. Jaylen Brown hi final MVP-ah thlan a ni zui ta nghe nghe. NBA season liam taah Celtics tan khel tha viau mah se Jaylen Brown hi USA aiawha Olympic hmachhawn turin thlan tel a ni lo tlat thung.
NBA Champion thar Celtics hi season liam ta khan an khel tha tluang hle a, regular season-ah vawi 64 zet an chak a, play-off a an record pawh 16-3 niin champion an phu hle.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More