NCC lama tithate lawmpui

Sports & Youth Services minister Robert Romawia Royte hoin Ningani khan Mizo Air Squadron NCC hnuaia cadet pahnih, kumin Republic Day Camp New Delhi-a tel pha, cadet under officer pahnih leh care taker officer thawk thaa thlan pahnih te lawmpuina leh chawimawina hman a ni.
Republic Day Camp-a tel pha cadet under officer pahnih – Kenny Lalrinawma Singh leh cadet under officer Laltlansangi, Pachhunga University College ve ve chu lawmpuina thilpek – laptop leh certificate a hlan a. Care taker officer (CTO) hna thawk tha – associate professor Lalrinsangi Nghinglova, Govt. Zirtiri Residential Science College (Best CTO in Senior Division/ Senior Wing Category 2022-2023) leh Sanju Karwar, Govt. Diakkawn High School Kolasib (Best Care Taker Officer in Junior Division /Junior Wing Category, 2022-2023) te hnenah sumfai Rs 5000 leh certificate a hlan bawk.
Minister chuan 1 Mizo Air Sqn NCC hmalakna chhuanawm a tih thu leh NCC cadet-te hlawhtlinna phena sulsutu pawimawh tak care taker officer (CTO) te thahnemngaihna fakawm a tih thu a sawi a. CTO hnathawk tha chawimawina hlante chu chhuanawm tiin, an hmalakna tha taka chhunzawm zel turin a chah.
1 Mizo Air Squadron NCC hi 2011 May 11 khan Aizawlah din a ni a. Hlawhtlinna hrang hrang dawng tawhin zirna in 25 – college 6 leh high school 19 ah kalpui niin, tunah hian cadet 1800, senior division/ senior wing 300 leh junior division/ junior wing 1500 an awm mek. Kum 2022- 2023 chhung khan cadet 17 chuan sawrkar laipui hnuaia buatsaih camp – EBSB, trekking, para basic course, Air Force attachment camp, All India Vayu Sainik Camp leh Republic Day Camp-te state pawnah an chhim a. Heng zinga ngaihhlut hlawh ber Republic Day Camp Delhi-a neihah Mizoram atangin NCC cadet pahnih hi NCC Directorate North Eastern Region aiawhin an tel a ni.