NCP hruaitu Ajit Pawar-an Maharsahtra BJP sorkar zawm

On Jul 3, 2023 8 0

Pathianni khan Nationalist Congress Party hotu Ajit Pawar leh party leader dang 9 te chuan Maharashtra sorkar an zawm a. Pawar hi BJP hotu Devendra Fadnavis nen Deputy Chief Minister an ni dun nghal a ni.
Ajit Pawar hian NCP MLA 53 atangin 43 thlawpna a nei tia sawi a ni a. A hmain Pawar chuan Maharashtra Assembly-a Leader of Opposition nihna bansan a duh thu a lo sawi lawk sa tawh bawk.
A hmain NCP legislator te chu Ajit Pawar chenna Mumbai-ah inhmukhawmin hetah hian party working president Supriya Sule leh senior leader Chhagan Bhujbal te pawh an tel a. State party president Jayant Patil erawh a tel lo thung.
NCP supremo Sharad Pawar thung chuan Pune-a reporter te hnenah Mumbai-a inhmuhkhawmna hi a hriatpui loh thu a sawi thung a.
“Eng vanga meeting ko nge an nih ka hre lo va. Mahse, Ajit Pawar chu leader of Opposition a nih avangin MLA te kokhawm turin thuneihna a nei a ni. A tih dan fo a ni a, eng nge an rel dawn ka hre lo,” tiin Pawar chuan a sawi.
NCP buaina hi thla kaltaa Sharad Pawar-an party chief a nihna a bansan leh a hnu ni thum leka a inhnuhdawh leh taka ‘party mipuite duhdan ka namnul thei lo’ a tih atang intan a ni bera sawi a ni a.
Ajit Pawar hian kum 2019 khan BJP te nena thawhhoa sorkar siam tum tawhin zing lamah deputy chief minister atana lak luh hman a ni hial a, NCP state president nih tum reng a ni.
Mahse, NCP chhungah party post pawimawhah dah ni lo zuiin Sule leh party leader Praful Patel te chu June 10 khan working president atana hlankai an ni ta zawk a ni.