France ram chu buainain tuam zui zelin zan nga teh lawih police leh lungawilote inbeihna thleng tawhin Marseille khawpuiah phei chuan inbeihna a nasa hle.
Police-te chuan lungawilote hnawhdarh nan tear gas te hmangin Marseille khawpui bikah hian mi 56 an man tawh bawk a. Paris khawpuiah erawh police an thathnem em vangin buaina a zia deuh tia sawi a ni.
Hetianga lungawilohna awmna chhan ber hi kum 17 leka upa Nehl M traffic stop atanga a tlan lui kahhlum a nih avanga intan a ni a.
Kar kalta Thawhlehni atang khan French khawpui hrang hrangah lungawilohna lantirin Paris khawpui daifem Naterre a thil thlengin a hrin a ni vek a.
Paris khawpuiah chuan social media kaltlangin pungkhawm tura insawmna nasa tak thehdarh a ni a, mahe, Champs-Elysees a police thahnem tak dah an nih avangin buaina a thleng nasa lo thung.
Paris bikah hian mi 194 man ni tawhin Paris region puma bus leh tram tin te pawh zan hnih lai tlantir loh a ni.
Hmar lama Lille khawpuiah pawh police special forces te chuan kawtthler tuamin hei hi a hma zana mipui lungawilo tena car te hala nasa taka chet an lak vang a ni a. Lyon khawpuiah pawh mi sawm hnih pakhat man niin Nice leh Strasbourg khawpuiah pawh inbeihna a thleng bawk.
France ram buaina chhan ber hi tleirawl Nahel chu traffic check ah ding tura tih laia ding duh lovin kah zui a ni a, a thih phah ta a ni. Nahel kaphlumtu hi thubuai siamsak tawh niin ngaihdam dilna pawh a siam tawh bawk a.
Nahel thihna hian French police tena kum 2017 a dan thar an hman firearms law hmanga vehicle ding tura an tih a din loh avanga kah theihna thupek an neih chu siam that duhna leh duh lohna nasa takin a siam zui a ni. Lungawilohna lan tir pawh he dan duh lohna vang a ni nasa bawk.
Chung piah lamah chuan France ram chhunga racism nasat zia pholanna nia ngaih niin UN human rights office pwhin tun buaina thleng mek chu France in law enforcement lama racism thuk taka inbilh lut a siamthatna hun remchang a tihsak bawk.
-- Advertisement --
Nahel kah a nih dan?
Zan dar riat velah motorcycle a chuang police pahnih te chuan Polish number plate nei Mercedes chu bus lane-ah chak taka a tlan an hmu a. An siren tiri zuiin car an umphak hnuah a chhungah tleirawl pathum an chuang tih an hria.
Officer te chuan driver chu vehicle chu tiding turin an ti a, tiding duh lova tlanzuiin officer te chuan umin radio hmangin an thawhpuite an hrilh zui nghal a.
A hnuah mercedes chu traffic jam-ah tangin police te chuan an um pha a, motorcycle atanga chhukin silai lekchhuakin car an pan ta a ni. Driver chu silaia tinin a tlanzui tawh loh nan an vau an ti a.
Officer te chuan driver chu car ti thi tura an tih laiin car chu a tikal zui a, officer pakhat chuan silai hmet puak zuiin Nahel chu a awmah a fuh ta a ni. A hnuah car chu dingin passenger pakhat chu a tlanchhia a, pakhat chu an man zui a ni.
He Mercedes A class AMG hi tleirawl pathum te hian len vahkual vel nana an hawh tia sawi a ni a. French motoring website Autoplus chuan German sportscar hian Polish number plate neiin nikhata 300-3,000 euros vela hawh theih a ni a. Hetianga car hawha len kual vel hi French tleirawl tena an uar em em a ni, an ti bawk.
Kahhlum tak tleirawl Nahel M hian tun hmain criminal record a nei lo va, mahse, licence nei lova vehicle khalh tia chhinchhiah tawh niin license nei thei turin a kumin a la tlin loh avangin ding tura an tihah pawh a din duh loh phah nia ngaih a ni a, license nei lova vehicle khalh a nih avang hian September thlaa juvenile court-a inlan tura tih mek a ni bawk.