NCST hotuten larsap leh CM kawm

NCST hotuten larsap leh CM kawm
Scheduled tribe-te hmasawnna tur leh an dinhmun chawisan kawnga hmalakna zirchianga Mizoram rawn tlawhtu, National Commission for Scheduled Tribes hotute chuan Ningani khan larsap leh chief minister an kawm.
Raj Bhavan-a an inkawmnaah larsap Gen. Vijay Kumar Singh (Retd) chuan, scheduled tribe dinhmun zirchianga Mizoram an tlawh avangin lawmawm a tih thu a sawi a. Mizoram chu ST deuh vek chenna state a nih avangin ST tana hmasawnna leh hamthatna awm theite tha taka kalpui a nih theihnan tan lak a pawimawh tih a sawi a ni.
NCST hotute chuan Mizoram an cham chhunga an thil hmuh hrang hrang leh zirchianna bakah state hmasawnna atana tul nia an hriatte larsap hnenah hian an thlen a ni
Chief minister an kawmnaah NCST chairman leh member ten kokim taka Mizoram an rawn tlawh avangin chief minister hian lawmthu a lo hrilh a. Thutkhawm an koh leh Autonomous District Council an tlawh chuan rah tha a chhuah ngei a beisei tih sawiin, “Kan ADC-ten hmasawnna hna tam zawk an thawh theihnan budget pangngai bak sawrkar laipuiin additional fund siamsak thei se kan duh a. Union minister for Minority Affairs bulah pawh ka sawi tawh thin,” a ti.
Working women hostel 6 sak mek a ni a, women college chu an inkawmna behchhan hian sawrkar laipuiah project siam a that a ring tih chief minister hian a sawi a. Ruihhlo tawlhruk hluar zel do turin Coordination Committee chak tak an din a, an bei zel dawn tih a sawi.
Hindi education an ngaipawimawh a, zirnaah ‘three language formula’ kalpui theih tha an ti, tiin, Commission ngaihpawimawh thila Mizoram sawrkar hmalakna tlangpui a lo hrilh a ni.
Commission member-te hian Mizoram sawrkarin a lo dawnsawn danah lawmthu an sawi a. An ngaihpawimawh thil chief minister hnenah hian thlenin, a tulna apiangah Mizoram sawrkar tanpui tura an inpeih thu an hrilh. Delhi lama a zin leh hunah Commission tlawh ve ngei turin an sawm bawk.
National Commission for Scheduled Tribes hi an chairman Antar Singh Arya, member dang – Nirupam Chakma, Dr Asha Lakra, Jatothu Hussain leh anmahni tawiawmtu official-te an ni.