NE-a power tihchangtlunna tur thlen
North Eastern Regional Power Committee hnuaia hmarchhak state Power minister-te chuan Thawhlehni khan Union Power minister Manoharlal Khattar chu New Delhi-ah an hmu a, India hmarchhaka power sector tihchangtlunna tur rawtna leh mamawh an sawipui.
Union minister hmuhnaah hian NERPC chairman, Meghalaya Power minister Metbah Lyngdoh kaihhruaiin Mizoram Power minister F Rodingliana, Arunachal Pradesh deputy chief minister Chowna Mein leh state dang official-te an tel a. Regional power grid tihchangtlunna tur thlenin, grid modernisation kalpuina sum mamawh ngaihtuah sak turin an ngen. Power System Development Fund kalpui dan tihdanglam a nih tak avanga hmarchhak state-te project thehluh tawh special assistance kaltlanga tihhlawhtlin sak turin an ngen bawk.
Hmarchhak state tana project pawimawh bik, priority project an thlen zingah SCADA /EMS project leh Emergency Restoration System (ERS) tihpuitlinna tur ngaihtuahsak a tel a ni.
India hmarchhak chu tlangram chhengchhia a nih avanga project leh hna dang thawhna kawngah harsatna an tawk thin tih an thlen a. Tlangram hmun kilkhawra khaw inhlat tak takah transmission line thui tak kaltir a ngaih thin avangin chatlak loa power supply pek kawngah harsatna a siam nasa a. Hmun kilkhawr zawkah sub- station dah belh a tul tih an thlen
Mizoram Power minister pawhin hmarchhak tihhmasawnna tura ruahman, ministry 54-in an budget atanga zaa 10 zel hmarchhak tana an dahhran tur, 10% Gross Budgetary Support (GBS) chu langtlang leh tangkai zawka hman a nih theihnan ruahmanna siamsak turin Manoharlal Khattar hi a ngen a. A bikin power sector tihhmasawnna atan 10% GBS atanga sum tam zawk dah hrang turin a ngen.
Hmarchhak state-ten power sector tihchangtlunna tur sum mamawh an thlen chu Union Finance minister a lo sawipui tur thu a lo hrilh a. Project sum mamawh zawng zawng sawrkar laipuiin a tum vek theih dawn loh avangin state nen tangtlanga tih a ngai dawn a; state-ten engzat nge an tum ve theih ang tih chhut a, ruahmanna fel tak siamho hnuah, Ministry of Finance lama nawr zui a nih tur thu a lo hrilh a ni.
Union Power minister hian smart metre vuah mek chu ngaipawimawh tur leh zawh thuai a nih theihnan chak taka hma la turin minister-te hi a lo ngen a. Mipuiin smart meter hnathawh dan dik tak an hriatthiam theihnan ‘check-meter’ vuah ngaipawimawh turin a chah. Hmarchhak state-a minister-te chu transmission lost titlemna atana hma la zel tur leh a theih chin chinah commercialization lam hawi turin a lo chah bawk.