NE huap NCC Girls Football khel mek Football thar chherchhuaktu kan ni – Home minister

Rajiv Gandhi Stadium Mualpuiah National Cadet Corps Inter- Group Pre-Subroto U-17 Girls Football Tournament khelh tan a ni a. Tun tum tournament hi Directorate of North Eastern Region NCC hnuaia NCC Group Headquarters Aizawl-in a thleng a ni.
A hawnna hmanpuitu Home minister K Sapdanga chuan, North East State hrang hrang atanga inkhel tura lokalte chu Mizoram aiawhin a lo lawm tih a sawi a; hmarchhak state-te chu India ram pumpui ang pawha footballer tha tak tak chher chhuak thintu an ni, tiin, India ram mai ni lo, ram pawn thleng pawha inkhel thiam tirchhuak zel theitu ni tura theihtawp chhuah turin tournament-a telte a chah tih a sawi.
NCC-in hetiang tournament a buatsaih chu lawmawm a tih thu sawiin, hmeichhe inkhel thinte tana kawng hawnsaktu pawimawh a ni tih a sawi a. Football khel tura quality pawimawh chu NCC kalphung nen pawh inmil tak a ni tih sawiin, inelna a nih rualin inunauna tha zawk siamna atan hun hmang tel turin a chah bawk.
Pre- Subroto Cup-ah hian North East state hrang hrang atangin team 8 – Silchar Group, Aizawl Group, Kohima Group, Jorhat Group, Guwahati Group, Shillong Group, Tezpur Group leh Dibrugarh Group an inel dawn a, June 17-ah final khelh tur a ni. Heta chak chu North East Region player atan thlan an ni anga, Delhi-a International Football Cup August 2026-a neih turah an khel dawn a ni.