NE Power minister thukhawm Mizoram mamawh/harsatna thlen
India hmarchhak biala Power minister intawhkhawm, North Eastern Region Power Minister Conference chu July 9 khan Guwahati-ah Union Power minister Manohar Lal Khattar hoa neih a ni a. Power & Electricity minister F Rodingliana telin, kawlphetha a intodelh tura Mizoramin hma a lakna kawnga mamawh leh harsatna a thlen.
Minister chuan Mizoram sawrkarin kawlphethaa intodelh chu a ngaihpawimawh ber, ‘top priority’ zingah a dah tih Union Power minister hi hrilhin, sawrkar laipuiin megawatt 24 hnuailam, small hydro power project siamnana financial assistance a pek thin, kum 2017 hnulama tihtawp tak chu tharthawh leh turin a ngen.
Hemi chungchang hi North East Region Power Committee thutkhawmah a lo chhawp chhuak tawh a, hmarchhaka Power minister-ten he policy tinung leh tura central cabinet pawmpuina hmuh thuai a nih theih nan hma lak tlan an lo rel tawh tih F Rodingliana hian a sawi a. Mizoram chu kawlphetha megawatt 3000 aia tam tharchhuak thei a nih laiin, tunah Mw 40 pawh tlinglo a siamchhuak a, chutihlaiin state mamawh san lai berah Mw 160 a ni thin a, thal laia Mw 130 chuang phailam atanga lakluh reng a ngaih avangin central-in kawng hrang hranga a puih a mamawh tih a sawi a ni.
Sawrkar tanpuina tel lo chuan Mizoram bakah hmarchhak state dang tan pawh hydel project thar sual chhuah a harsat avangin Small Hydro Power Incentive Scheme thar duan tawh, central cabinet approval lak hmabak chu an thutkhawm leh hmasak bera pawm a nih theih nan hma lakpui turin Union Power minister hi a ngen a ni.
Union Power minister chuan India-in kum 2030 hma in renewable energy gigawatt 500 tharchhuah hman a tum avangin NE state-te hydro power tam tak tharchhuak thei an nihna chu hman tangkai a tul tih a sawi a. Central scheme kalpui mek, NERPSIP leh RDSS hnathawh a hun taka zo turin a chah. AT&C loss tam lutuk tihtlem nan Smart Metering Project kalpui thuai turin a chah bawk.
NE Power Minister Conference-ah hian Mizoram, Assam, Nagaland, Tripura, Manipur, Sikkim leh Meghalaya Power minister leh secretary theuhte, Ministry of Power official-te leh he ministry hnuaia public sector undertaking aiawhte an tel a ni.
Mizoram minister thusawi dang:
8 Mizoram chu India hmarchhak kil tawp, tlangram chhengchhe taka awm a nih avangin bungrua phurh man a to zual bik a; hei hian state dang thenkhat aiin scheme leh project hnathawhna man a tisang bik lo thei loa, he harsatna hi hriatthiampui a, ngaihhnathiamna nei turin Union Power minister leh central official dangte a ngen.
8 Hmarchhak state thenkhatten power generation chungchangah thui tak an lo kal tawh laiin, Mizoram chu bul tan thar tur chauh a ni a. State thenkhatin sub-station thar 40 chuang siamna tur an dawn laia pahnih chauh pek an ni bik chu a hre thiam lo tih a sawi.
8 Mizorama power generation, transmission leh distribution infrastructure thawmthatna tur mamawh tam zawk central ministry-ah a thlen tur thu a sawi a. Lo tihhlawhtlin sak turin Union minister bakah Ministry of Power-a official-te a ngen.
8 Union Power minister chu hun remchangah Mizorama lo zin a, state dinhmun a taka hmuhpui turin a sawm a. Union minister hian remchang hmasa bera lo zin a tum tur thu a sawi.