Nepal-a ruah vanga chhiatna thlengah mi 47 thi tawh
Nepal-a ruah vanga chhiatna thlengah mi 47 thi tawh
Zirtawpni atanga ruah nasa taka sur avangin Nepal-ah lei a min a, tui lianin kawng a dang a, lei tam tak a la bawk tih thuneituten an sawi a, thi pawh mi 47 vel an awm tawh niin Pathianni khan an sawi.
Khawchhak lama India nena an inrina, Ilam district-a lei minna hmun hrang hrangah mi 35 an thi niin Armed Police Force thupuangtu, Kalidas Dhauboji-a chuan a sawi.
Hmun dangah tui lianin mi pakua lain an chin an la hre lo va, mi pathum tekin a deng hlum bawk tih a sawi.
“Chin hriat lohte zawn hna hi thawh mek zel a la ni,” tiin National Disaster Risk Reduction & Management Authority thupuangtu, Shanti Mahat chuan a sawi.
India khawchhak lam, West Bengal-a Darjeeling-ah pawh ruah sur nasa avanga lei minah mi pasarih vel an thi bawk niin tual chhung chanchinbuten an tar lang hlawm.
“Ruang pasarih lak chhuah tawh a ni a, mi dang pahnih hmuh loh an la awm nia sawi a ni a, lak chhuak tuma beih mek zel a ni,” tiin Darjeeling district police hotu, Abhishek Roy-a chuan Pathianni khan a sawi niin Indian news agency ANI chuan X-ah an tar lang.
Lei min hian kawng a hnawh bakah tui lianin kawng a la nasa a, khualzin za tel an buai phah niin thuneituten an sawi.
Nepal-a thlawhna tumhmun lian ber, Kathmandu airport thupuangtu, Rinji Sherpa chuan, “Tual chhunga thlawk chu a buai phah hle a; mahse, ram dang thlawk erawh dan pangngaia kalpui a ni,” a ti.
Nepal chhimchhak lama Koshi River chu hlauhawm chin chhinchhiahna chung lamah a luang mek tih district thuneituin a sawi a, he lui hi India khawchhak lam, Bihar-a kum tin deuhthaw tui lian thlentu a ni.
Sunsari district Governor Dharmendra Kumar Mishra-a chuan Koshi Barrage-a gate 56-te chu tui a chhuah that theih nan kuminah hawn vek a ni tih a sawi a, kum dangah chuan 10 atanga 12 vel chauh hawn a ngai thin niin a sawi a. Hei vang hian leia lirthei vei vel pawh khap rih a ni tih a sawi.
Tlang awih panga awm, Kathmandu-ah chuan lui tam zawk luang liamin kawngah a tling a, chenna in tam tam tak a chim a. Temple awm tamna khawpui hi an ram hmun dang atangin lirtheia tlawh theih a ni rih lo.
Tlangram, Nepal-ah hian kum tin fur lai hian lei min leh tui lian a tam a, mi za telin an thih phah ziah a, fur hian June thla laihawl atanga September thla chanve vel thleng a awh thin.