Russia-in Ukraine a beihnaah mi pali thih belh leh

Russia-in Ukraine a beihnaah mi pali thih belh leh
Russia chuan Inrinni zan khan nasa takin missile leh drone hmangin Ukraine a kap leh tih Pathianni khan thuneituten an sawi a, mi panga vel thi awmin region tam takah mipui vantlang intawm thil leh energy hmun an tichhia.
Thi zinga pali hi khawthlang lam, Poland nena an inrina, Lviv region-a chhungkaw pakhata mite niin an in kah fuh a ni tih tual chhung prosecutor-ten an sawi.
Lviv region khawpuia industry awmna hmunui chu a kang a, khawpui chhung hmun thenkhatah power suplly a awm loh phah tih Mayor Andriy Sadovyi-a’n a sawi a, mi chengte chu beihna dang la tawng thei an nih avangin ina tawm turin a chah bawk.
Reuters correspondent chuan zing khaw var hma atangin thil puak ring tak tak a awm a, air defence chu hmun hrang hrang hawia kah chhuah a ni bawk tih a sawi a. State Emergency Service chuan tun tum hi indo tawh chhunga Lviv region beihna nasat ber tum a nih a rinawm tih Ukrainian television-ah a sawi.
Chhimchhak lam, Zaporizhzhia-ah mi pakhat thiin mi dang 10-in hliam an tuar bawk tih Governor Ivan Fedorov-a’n a sawi a, chhungkaw 73,000 chuangin power supply an hmu lo bawk.
Ivano-Frankivsk, Vinnytsia, Chernihiv, Kherson, Kharkiv leh Odesa region-ah vantlang thil beih a ni bawk tih Prime Minister Yulia Svyrydenko-i’n a sawi.
Ukrainian energy ministry chuan Zaporizhzhia leh hmar lama Chernihiv region-a power hmunpui tihchhiat a ni tih a sawi.
Russian defence ministry chuan Pathianni khan Ukrainian military-industrial facility-te bakah boruakalhthei pek chhuahna hmunpui an tichhia tih a sawi ve bawk.
Moscow hian tun hnaiah Ukraine-a energy grid a bei nasa a, an indo tawha thlasik a thlen vawi lina tawh tur niin tihtawp tuma palai hna thawhin awmzia a la nei thei lo rih zel.
President Volodymyr Zelenskiy-a chuan Russian sipaite hian missile 50 chuang leh drone 500 dawn hmangin an bei niin a sawi.
NATO member Poland chuan Pathianni tuk atang khan an ram chung boruak a him theih nan an thlawhna thlawhtirin an veng bawk.
“Polish leh a thawhpui thlawhnate chuan kan chung boruak an veng a, lei lam atanga venna leh radar reconnaissance system pawh inrin theihna sang bera dah an ni,” tiin Poland-a operational command chuan X-ah a tar lang.
Khawchhak lama NATO member-te hi tun hnaiah Poland-a Russian drone ni ngeia ngaih an kah thlak avang leh Copenhagen leh Munich vela rinhlelhawm thil an hmuh hnuah Russia-in indo huang a zauh mai theihna lakah an inring hle.
Lithuania khawpui, Vilnius-a thlawhna tumhmun pawh Inrinni zan khan balloon thahnem takin a pan nia a lan avangin darkar eng emaw zat khar a ni.