Netanyahu-a’n Gaza-a Hamas dotu pawl a pui thin

On Jun 7, 2025 10 0

Netanyahu-a’n Gaza-a Hamas dotu pawl a pui thin
Israeli Prime Minister Benjamin Netanyahu-a chian Israel-in Gaza-a ralthuam keng pawl pakhat, Hamas duh lotu nia a sawi chu a pui tih a sawi.
Israeli chanchinbuten Netanyahu-a’n Gaza-a pawl pakhat a pui thin tih an tar lan hnuah a sawi chhuak zui a. Israeli politician tam takte erawh chuan Israeli himna a tiderthawng niin an ngai.
“Eng nge dik lo awm?” tiin Netanyahu-a hian video tawi te X-a a dahah a sawi a. “Israeli sipaite hum nan chauhva tih a ni a, Hamas-te puitu anga chhuah a ni,” a ti.
Israeli prime minister-in Gaza-a a puih pawl, ralthuam a pek thinte hi Yasser Abu Shabab-a kaihhruai nia hriat a ni.
Hel pawl hi dan pela che thin pawl, an mite pawh hel, Hamas eptu nia hriat an ni a. Gaza-a puihna phur luttu truck ven an tum a, thenkhat erawh chuan an ru zawk thin niin an sawi ve thung.
A pui thin tih a tlangthang ta hi Netanyahu-a tan chuan politics-a amah beihna remchang tak a ni thei.
A puan chhuah hma hian Israeli defence chuan tual chhung chanchinbu thenkhatte hnenah eptu hruaitu, Avigdor Lieberman-a’n Gaza-a pawl pakhat pui thin anga a sawina chu a dik tih an hrilh hlawm.
Yisrael Beiteinu party hotu, Lieberman-a hian broadcaster, Kan hnenah Netanyahu-a hian Abu Shabab clan hnenah ralthuam a pe thin tih a lo sawi tawh a. Cabinet pawmpuina pawh awm lovin a pui niin a sawi bawk.
Israeli defence chuan Abu Shabab clan hi Kalashnikov rifle an pe a, heng zinga thenkhat hi Hamas hnen atanga an chhuhsak a ni tih an sawi.
Clan hi Israeli sipaite thunun lai, Rafah leh a chhehvela chetla an ni.
Hetih lai hian Yasser Abu Shabab-a chuan Israel-in ralthuam a pe thin nia sawi chu a pha a. “Kan hmanruate hi a mawlmang a, a hlui tawh em em a, keimahnia kan neih a ni,” a ti.
Hamas chuan Abu Shabab-a chet dan hi an ngaimawh tawh thin a, Arabic chanchinbu pakhat chuan Hamas armed wing chu an member-te thah tumin an lo che chhuak tawh thin niin a tar lang.
Netanyahu-a’n Gaza-a hel pawl a pui tih a darh hnuah sawiseltu an awm nual a. Knesst-a Democrats hruaitu, Yair Golan chuan, “Netanyahu-a hi Israel ram himna tiderthawngtu a ni,” tiin X-ah a tar lang hial a ni.