Netanyahu-a’n Palestinian-te tana ram din duhte dem

Netanyahu-a’n Palestinian-te tana ram din duhte dem
Israeli Prime Minister Benjamin Netanyahu-a chuan UN General Assembly-a thu a sawinaah khawthlang ramten Palestinian State an pawm chu na takina dem.
Netanyahu-a hian ram atana pawm chu ‘zahthlak lantirna’ a ti a, ‘Judate thahna’ a ti bawk.
Israeli prime minister-in thu sawi tura dawhsan a kai chiah hian ram tam tak thuneitu leh palaite chuan inkhawmna hmun an chhuahsan a, conference hall hmun zau taka thutna tam zawk chu a ruak a. Pawn lamah pawh Times Square-a Israel-in Gaza a beih duh lohna punkhawm huaihawt a ni bawk.
Israel hian sipai chakna hmanga Gaza a bei chu ram tam takin an dem a. Kar kal ta khan UK, France, Canada, Australia leh ram dang eng emaw zatin Palestine chu ramah an pawm thar nghe nghe.
Thu a sawi tanah Netanyahu-a hian map tilangin ‘The Curse’ tiin a sawi a, Iranian-te nena inzawm Middle East-a pawl hrang hrang a pho chhuak a. Israeli sipaiten kum khat liam ta chhunga Lebanon-a Hezbollah, Yemen-a Houthi leh Gaza leh Iran-a Hamas laka beihpui a thlaknate a tar lang bawk.
June thlaa Iran-a Fardo nuclear hmun an bomb-naa American an tel ve avangin US President Donald Trump chungah lawm thu a sawi a. Hamas-ten October 7, 2023-a Israel leh US-in 9/11 attack a tawrh chu inang tlang niin a sawi zui a. Ram pahnihte chuan hmelma thuhmun an bei a, Iran nena inzawm pawlten ‘America thihna tur’ tia au hla an neih a sawi chhuak bawk.
Israeli prime minister hian Israel chuan Palestinian-te tan ram a din an phal loh thu sawi nawn lehin an tanna hi Israeli tam zawk duh dan a nih thu a sawi.
UN commission of inquiry-in Israel hian Gaza indonaah mi a suat nia an sawi pawh ‘tanchhan tha nei lo’ a ti.
UN agency hrang hrangten Israel-in Gaza-ah puihna a luhtir tlem an tih leh August-a UN puih pawlin Gaza City-ah tam a tla tih an sawi pawh a dik loh thu a sawi.
Thu a sawi hma lawk hian Netanyahu-a pisa chuan Israeli sipaite chu Gaza hnaiha truck-a aurinna hmangin a thu sawi live-a tichhuak turin an ti.
Netanyahu-a chuan Israeli intelligent-ten Gaza-a mite smartphone khawih buai (hack)-in a thu sawi hi an ngaithla bawk tih a sawi.
Prime Minister Netanyahu-a hian a thu sawi tawp lamah hian Israel thenawm ram hnaihte chungchang a sawi nasa a, Syria nena an inkara inremna awm pawh a derthawn thu leh Lebanese sorkar chu an rama awm Hezbollah-ten ralthuam an chelek tawh loh nana hma la turin a ti bawk.
Netanyahu-a thu sawi hi Israel-a eptu hruaitute chuan tha a ti lo hle a, Yair Lapid-a phei chuan an ram dinhmun a tichhe lehzual niin a sawi hial a ni.
Netanyahu-a’n thu a sawi zawh hnuah lawkah US President Trump-a chuan thuthar lakhawmtute hnenah, “Gaza chungchangah hian inremna kan nei thuai dawn,” a ti a. Eng ang inremna tur nge tih erawh engmah a sawi thui lo va, rin dan hrang hrang awm zingah erawh inkahhai puang tura inremna a nih rinna chu a langsar ber a ni.
West Bank-a thuneihna chang mektu, Palestinian Authority hruaitu, Mahmoud Abbas-a chuan Netanyahu-a’n UN General Assembly-a thu a sawi hma ni chiah khan thu sawi vein Israel leh Palestinian-te inkara muanna a awmna tura ruahmanna awm kalpui turin ram dang hruaitute thawhpui turin an inpeih tih a sawi a. Ruahmanna hi Thawhtanni khan France-in rawtin ram pahnih din ni se an ti a ni.
‘Gaza indona’ tia khawvelin a sawi zui tak, Israel-in Palestinian-te chenna, Gaza Strip a beih hi October 7, 2023 atanga intan kha niin kum hnih dawn a ni ta.
October 7, 2023-ah hian Israel chhim lamah Gaza-a thuneihna chelhtu hel pawl, Hamas fighter-te lutin mi 1,200 chuang an that a, hren turin mi 251 an hruai bawk.
Hemi hnuah hian Israel che chhuak nghalin sipai chakna hmangin Gaza hi a bei a, Hamas chhut chimih tumin thapui a thawh zui ta a ni.
Inkahhai puan zauh awmin hetih chhungin mi hrente hi chhuah an ni a, mi 48 erawh hren an la ni.
Israel hian Hamas nawr nan hun rei tak Gaza-a puihna lut thin a dang a, nasa taka a beih reng bawk avangin mi chengte an tam a, an chenna tihchhiatsak an nih avangin mi maktaduai chuang baihvaiin an awm.
Gaza-ah hian ram dang chanchinbu mite chu luh phalsak an ni lo va, luh phalsakte pawh Israeli sipaite thununna hnuaiah zel chauh an che thei.
Tun thlengin Palestinian 65,549 thi an awm tawh niin Hamas health ministry-in a sawi.