Netherland in World Cup an hnaih

Pathianni zan khan Europe khawmual atanga World Cup 2026 khel tur zawnna khelh chhunzawm a ni a, an mualah 4-0 a chak Netherlands in WC 2026 an hnaih leh zual. Netherlands in World Cup khelh phak an hnaih laiin Denmark leh Scotland te an inel tawk chhunzawm viau thung.
Depay a vul
Group G hmahruaitu Netherlands hian Johan Cruijff Arena -ah khelh ruk atanga point 10 hmu tawh Finland an mikhual. An mikhual lakah an khel tha viau a, si li fai ngawtin an chak. An mualah 4-0 ngawta an chak tum hian Memphis Depay chuan goal khat a thun a, assist vawi hnih a nei bawk. Depay hian Netherlands tan goal khung hnem ber a nihna tihzauh bakah Netherlands tan assist ngah ber record a siam tel bawk a, ram tan a vul chhunzawm zel.
Netherlands hian an mualah bul an tan tha viau a, chawlhlawk hmain goal thum an thun hmang. Inkhel tan atanga minute 8-na lekah Donyell Malen chuan Memphis Depay siamsak atangin hmahruaina goal a thun nghal. Hma taka goal an thun vangin an phur a, an mualah inrintawkna sang zawk nen an inlan zui a, an khel tha zui viau nghe nghe.
Mallen goal thun hnuin an khingpuite na takin an nawr chhunzawm a, an hlawhtling leh thuai. Defender tha tak Virgil van Dijk chuan Depay siamsak atang bawkin minute 17-naah Netherlands goal hnihna a thun. Si hnih faia hma an hruai hnuin Netherlands hian chawlhlawk dawn hnaihah penalty an hmu. He penalty hi assist vawi hnih nei tawh Memphis Depay chuan a pet goal a, an goal thumna thunin an hmahruaina a tizau a, si thum faia hmahruai chungin chawlhlawk an hmang.
Depay hian Robin van Persie record khumin Netherlands tan goal thun hnem ber record a lo siam tawh a, ram tan goal 54 thun tling tawhin a record a zau belh deuh deuh zel. Ram tana goal thun hnem ber a nih bakah Depay hian assist vawi 35 a nei tling ta chiah bawk a, Netherlands tan assist ngah ber record thar a siam leh bawk. Record pahnih a siamte hian Netherlands tan Depay khelh that theihzia a tilang chiang viau a ngaih a ni.
Chawlhlawk hnu lamah Netherlands an khel tha chhunzawm a, goal erawh an thun belh har ta viau thung. Goal lut a awm belh theih loh reng hnuin ram tana khel tha thei tak Gody Gakpo chuan hun tawp dawn hnaih minute 84-naah an goal lina thunin an tawp a khar a, an mualah point thum hlu tak an hmuh belh zui ta a, pen khatin World Cup an hnaih leh sawt.
Group G-a inkhel dangah pahnihnaa awm mek Poland chuan mikhual an nihna hmunah si hnih faiin hnehna an chang a, Netherlands kal fal lutuk tur an um ve zel.
Poland hi Lithuania hmachhawn turin S. Darius and S. Gireno Stadium ah an len lut. An len luhna mualah an khel tha viau a, chawlhlawk hma leh chawlhlawk hnu lamah goalkhat ve ve an thun. An goal hmahruai hi minute 15-na leka Sebastian Szymanski thun a ni a, an goal hnihna hi minute 64-naa Robert Lewandowski thun a ni ve thung. Lewandoski goal thun hnuin goal dang a luh belh tawh lova, Poland in Mimualah hnehna hlu tak an chang.
Group G-ah hian khelh ruk atanga point 16 hmui Netherlands in hma an hruai chhunzawm zel a. Poland in khelh ruk atanga thova point 13 hmuin pahnihna an luah zui zel bawk. Khelh sarih atanga point 10 hmui Finland in pathumna an luah a, Lithuania leh Malta tan tlin beisei tur a awm tawh lo thung.
Denmark an chak
Pathianni zanah Group C atanga inkhelah Denmark leh Scotland ten hnehna an chang ve ve a, hamhruaitu nih inchuhin an inel chhunzawm zel. Denmark leh Scotland te hian khelh li atangin point 10 an hmu ve ve mek a, an group-ah an inel fal.
Hamlet-a te ram Denmark hian Parken, Copenhagen-ah Greece an mikhual. An mikhual lakah an khel tha viau a, 3-1 in hnehna an chang. Denmark tan hian Napoli tana khel tha tak Rasmus Højlund chuan minute 21-naah hmahruaina goal a thun. Hmahruaina goal an thun hnuin khel an khel tha zui viau a, chawlhlawk dawn hnaihah khel tha lehzualin goal hnih an thun. Minute 40-naah Joachim Andersen chuan an goal hnihna a thun. An goal hnihna an thun atanga minute khat hnu lekah Mikkel Damsgaard chuan an goal thumna a thun zui leh bawk. Greece tan hian Christos Tzolis chuan minute 63-naah goal thun bawk mah se result a danglam phak tawh lova, Denmark in hnehna changin point thum an hmu.
Denmark an chak lai hian an elpui lian Scotland pawhin hnehna an chang ve bawk. Scotland hian an mikhual Scotland chu Ché Adams leh Scott McTominay te goal thun hmangin an hneh a, point thum an hmu ve bawk. Denmark leh Scotland te hi World Cup khel phak tumin an inel zui hle ngei ang.