Neutral-in ZPM an thlawp tawh lo – Robert Romawia Royte

Kum 2018 inthlan dawn angin ZPM party chuan kohhran an sawiri ngam tawh loa, neutral-ten an thlawp tawh lo niin minister Robert Romawia Royte chuan a sawi.

MNF Aizawl South-I Block-in 2023 MLA inthlanpui atana an inbuatsaihna, ‘Fehchhuah Runpui’ chu Zirtawpni khan MNF adviser ni bawk Robert Romawia Royte hian a khuhhawng a. Kum 2018 ang lo takin tunah chuan ZPM-in kohhran an sawiri ngam tawh lo a, mi tam takin an chhuahsan tawh nia a sawi bakah neutral-ten an support tawh lo tih a sawi. Khawvel political party history-ah party pariat vela zuanglawr tawh hnua chief minister ni ta khawi ramah mah an awm ngai lo tih a sawi bawk.

Congress party chuan chet lak an tum ngial pawhin an hniam zual zel nia sawiin, “An party president dinna bial turah an buai mek. ZPM hotupa pawhin a bial a tlanchhiatsan maithei an ti mek bawk,” a ti.

MLA inthlan tur chu MNF tan hun tha niin Robert Romawia hian a sawi a. Bial tinah MNF zawmtu an pung zel niin a sawi. “Tunhma chuan Aizawl South-I bial hi Mizoram puma MNF hmel lanna ber a ni thin a, hun engemawchen atangin MNF party-in MLA a nei ta lo. 2023 inthlan atang hian MNF MLA bialah siam leh kan tum a ni,” a ti.