New Market building sak mek tlawh

Aizawl Smart City project hnuaia Dawrpuia Aizawl New Market (Bara Bazar tihchangtlunna tur) sak mek chu Thawhtanni khan deputy chief minister Tawnluia’n a tlawh.
Deputy CM chuan building sak mek chu a len leh a rih dawn avangin a lei ngheh leh ngheh loh Geology & Mining mithiamte, Mizoram bakah Mizoram pawnlam mite rawn an ni tih a sawi a. Smart City project a nih avangin a sakna tur sum awmsa a ni a, contractor pawh a sak zawh rual ruala sum pek tlak theih a ni tih a sawi. Building sak vanga New Market chhunga eizawngte leh a bulhnaia sumdawngte tan harsatna a awm a nih pawhin hrethiam hram hram tura ngenin, Smart City project chu nakum June thleng chauh a ni a, mipui thlawpna leh tawiawmna a ngen thu leh, contractor pawh an hna quality tha se, working season chhunga sa zo turin a ngen nghal tih a sawi a ni.
Bialtu MLA, minister Robert Romawia Royte pawhin Bara Bazar building hlui chu a sakna a rei tawh avangin mipui tan a him tawk tawh loa, building sak thar a ni chu a lawmawmin mipui tan a pawimawh hle tih a sawi.
Aizawl New Market building sak thar hi Aizawl Smart City Limited chuan Smart City Mission hnuaiah a sak that hna a thawk a. Project atana sum ruahman hi cheng vaibelchhe 41.59 a ni. Building sak hna hi Lushai Engineers chuan thawkin thutna/ sumdawngmi 1105 leng tura ruahman a ni.
New Market Sumdawng hruaitute chuan building hluia sumdawnga dawr neite pawh building tharah hian dawr ruahman sak vek an nih dawn avangin sawrkar chungah an lawm hle tih a sawi a ni.