NewJeans Vs. Barbie: Billboard 200 No.1 a la chiang thei lo

NewJeans Vs. Barbie: Billboard 200 No.1 a la chiang thei lo
US-a No.1 album neih theih hi rimawi khawvelah chuan thil namai lo tak a ni a, khawvela zaithiam zawng zawngin he chart-a No.1 album neih theih hi an chak leh duhthusam a ni vek ang. Chu chu Billboard 200 (albums) chart an tih hi a ni. He chart ranking hi an rama Pathianni tlai lam, keini tana Thawhtanni tukah an tichhuak thin a, mahse, tunkar chart ranking erawh nimin thleng khan an la tichhuak thei tlat lo. Hei hi Billboard history-ah kar khat chhunga No.1 album a chian theih loh rei ber tum a la ni ngei ang.
Album pahnih an inum tawk zet mai a awm a, chu chu South Korean girl group NewJeans album thar ‘Get Up’ tih leh film hit zet mai Barbie soundtrack album te an ni a, anni pahnih zingah hian a khawi zawk nge No.1 tih an la puang thei tlat lo.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak (physical album) hralhna bakah streaming atanga album tlukpui leh album-a hla mal hralhna atanga album tlukpui te belhkhawm thin a ni a, album hralh hi kar khat- Zirtawpni atanga a karleh Ningani inkar lak thin a ni a, hei vang hian album pawh hi a tlangpui thuin Zirtawpni-ah an tlangzarh thin a ni.