News report khawih chingpen chungchang…

The Aizawl Post issue May 14, 2024 Thawhlehni phek hma news report pakhat “MP inthlana duty vanga vote thlak ve lo police sang chuang” tih thupui hmanga chhuah chu, social media lama thehdarh chhawngtu mi pakhatin, news report tawp lamah ama duhdana ziahzawmin ‘The Aizawl Post 14.5.2024’ tih hming pu siin a thehdarh a. Hemi chungchang hi The Aizawl Post chuan tlai-khaw-hnuah a hre ve chauh a, thil awmzia hriat a nih veleh hei hi chhui nghalin, a tul anga hma lak zui mek a ni a.
The Aizawl Post news report-ah hian, Lok Sabha election duty-a chhuak Mizoram Police zingah duty tura tirhchhuah an nih avanga vote thlak ve ta lo police sang chuang an awm thu leh, postal ballot hmanga vote thlak phalsak an nih tawh bawk si loh avangin lungawi lo an tam thu dawn a ni, tiin report-ah chuan tarlan a ni a.
Report paragraph tawp ber —Inthlan duty tura thu petu ber hi sawrkar laipuia Home ministry a ni a, Mizoramah chuan chief electoral officer office kaltlang loin Home/Police department-in a lo dawng a, hetiang hian ruahmanna siam a ni ta nia hriat a ni tih thleng chu The Aizawl Post report chin niin, hemi dawtah hian The Aizawl Post news post chhawngtu hian heti hian social media-ah a ziah belh a:
Mizoram sorkar ruahmanna felfai loh avanga kan Police te state pawna tirchhuah tak te vote pawh thlak thei lova an siam mai hi, an duh chuan an khing let thei mawlh ang, tiin.
Journalist-te hian reporting ethics hi an hriat chian avangin, editorial-ah tih loh, hetianga news report huanga comment dah tel hi an tih ngai loh thil a ni a, hetianga chanchinbu news report-a mahni duhdan lo ziah zawm ve mai hi a huatthlala hle a, mi thuziak khawih chingpenna a nih avangin dan anga hmalak theihna a ni. Tun hnua a thlen tawh loh nan a tul anga hma lak zui zel hi tihmakmawh a ni.
The Aizawl Post thu leh hla la chhawnga youtube lama chhiar thin engemawzat an awm tih pawh hriat a ni a, chutih laiin, an thulakna ‘source’ tarlang duh lo hi a tam zawk an ni awm e. Hei hi thil dik lo leh tha lo tak mai a ni a; literature huanga Plagiarism rawngkai tih theih a ni bawk awm e. An thulakna kha lo dik lo palh ta se, anmahni irawm chhuak anga an chhiar pawp pawp a nih si chuan, a mawhphurtu ber an ni dawn tihna a ni a. Hei hi hrechiang se chuan, source dah loh palh hi an hlau hlur ngei ang.