NEYCC vice chairman ah MPYCC president thlang

NEYCC vice chairman ah
MPYCC president thlang
India hmarchhak state hrang hranga Congress Thalai inzawmkhawmna, North East Youth Congress Coordination (NEYCC) vice chairman thar atan Mizoram Pradesh Youth Congress Committee president Laltawnliana thlan a ni.
Nilaini khan hmarchhak state tin Congress Thalai hruaitute hi Bhalukpong Arunachal Pradesh-ah an inhmukhawm a. Hetah hian NEYCC hruaitu thlan nghal niin, chairman-ah Arunachal PYCC president Tarh Johny, vice chairman pahnih awmin MPYCC president Laltawnliana leh Assam PYCC president thlan an ni. Treasurer-ah Nagaland PYCC president, general secretary ah Meghalaya PYCC president thlan an ni a. Asst general secretay pahnih thlan niin, covener atan State PYCC president dangte thlan an ni bawk.
NEYCC chairman thar chuan hmarchhak state tin Congress Thalai inzawmkhawm a tul hle tih sawiin, state mal ang chuan tang viau thin mah se, thil tih tak tak a harsa, tiin, BJP sawrkarin chhunglam leh pawnlam hmuh theihah min sawp chhiat nasat zia a sawi. Parliament-a Uniform Civil Code pass tum mek pawh hmarchhak Congress Thalai-in a huhoa do a ngai tih a sawi bawk.
NEYCC vice chairman thar Laltawnliana pawhin thu sawiin, “Pu Nehru’n India ram hi pangpar huan, a chhunga pangpar chi hrang hrang mawi tak par za a tehkhin angin, a chhungah hnam hrang hrang kan cheng a. Mahse, tunah erawh Nehru sawi thin chu BJP-in mausamin, hnam leh hnam inkarah inhuatna, intihbuaina a chhuak nasa a, sakhaw zalenna palzamin, India ram hi Hindu lal rama siam tumin an hmanhlel a, langsar takin an che mek a. Hei hi hmarchhak state pasarih hian a huhoin kan do dawn a ni,” a ti.